LJ voor strafste toets in 400-hekkies
2011-05-26 10:06
Pretoria - Haastig, sommer baie haastig, is die enigste manier om LJ van Zyl se vertonings in die 400 meter-hekkies te beskryf.
Hy het drie keer vanjaar deelgeneem en nog elke keer ’n tyd van wêreldgehalte opgestel. Sy wentye van 47.66 s (SA rekord), 47.73 en 48.11 is tot dusver vanjaar die vinnigste in internasionale atletiek.
Die groot vraag wat plaaslike atletiekondersteuners hulself afvra, is hoe lank Van Zyl kan volhou om sulke vinnige tye te hardloop.
Donderdagaand (om 20:03) se wedloop in Rome op die derde Diamantliga-byeenkoms sal waarskynlik sy strafste toets vanjaar wees. Vyf van sy teenstanders spog ook met tye van vinniger as 48 sekondes.
Johnny Dutch van die VSA was verlede jaar die naasvinnigste atleet (47.63), gevolg deur Javier Culson van Puerto Rico met ’n tyd van 47.72, Angelo Taylor van die VSA (47.79), Kerron Clement van die VSA (47.86) en David Greene van Brittanje (47.88).
Hennie Kotzé, sy afrigter, is stilweg vol vertroue dat Van Zyl weer ’n goeie wedloop gaan hardloop en kan wen.
“Die belangrikste is dat LJ hom nie moet bekommer oor wat sy teenstanders doen nie en net fokus op die wedloop-taktiek waarop ons ooreengekom het.
“Ek het twee tyd-doelwitte aan LJ gestel. Die eerste is by die vyfde hekkie en die tweede by die agtste hekkie. Dit is ook belangrik dat hy op sy pasritme fokus. As almal ná die vyfde hekkie steeds by mekaar is, moet LJ dit soos ’n halfeindronde-wedloop benader. Dit beteken hy moet ’n tyd vinniger as 48.20 hardloop.”
Usain Bolt van Jamaika se vertoning sal ook groot belangstelling wek. Dit is die eerste keer dat die wêreldrekordhouer in die 100 (9.58) weer deelneem nadat Tyson Gay van die VSA hom verlede jaar in Stockholm geklop het. Bolt was voor daardie wedloop twee jaar lank onoorwonne in die 100 m. Hy het agterna weens ’n rug- en hakskeenbeserings nie weer deelgeneem nie.
Bolt het in ’n onderhoud op die byeenkoms se webwerf gesê dat sy ondersteuners nie moet verwag dat hy dadelik ’n aardskuddende tyd gaan hardloop nie. “Die wedloop is net ’n losmaker om te sien waartoe ek op die oomblik in staat is.
Ek het vanjaar net een doelwit en dit is om my 100- en 200-titels op die Wêreldbyeenkoms in Suid-Korea te behou.” Asafa Powell (Jamaika), ’n voormalige wêreldrekordhouer (9.72), neem ook deel.
Mbulaeni Mulaudzi, Suid-Afrika se wêreldkampioen in die 800, is die eerste keer in amper 10 maande weer in aksie. Sunette Viljoen, Suid-Afrika se vroue spiesgooikampioen, sê haar vernaamste doelwit is om die kwalifiserende A-vereiste van 61 m vir die Wêreldbyeenkoms te oortref.
Peter van der Westhuizen is in die 5 000 m in aksie.
Vir die jongste sportnuus volg Nuus24Sport op Twitter.
- Sport24