Kritiek loop oor Woods se stilswye
2009-12-01 12:06
Orlando – Ondersteuners en kritici van Tiger Woods het sy webwerf ‘n forum gemaak vir hul smart, woede en spekulasie na kontroversiële gerugte wat rondgaan oor die 14-malige wenner.
Woods sal hierdie week se Chevron Wêreldkampioenskap, ‘n welsyngeleentheid wat hy jaarliks aanbied, mis as gevolg van die beserings wat hy in sy motorongeluk opgedoen het.
Hy sal glo ook eers weer volgende jaar aan kompetisies deelneem.
Spekulasie doen die ronde dat hy in sy motor was na ‘n twis met sy vrou Elin oor ‘n beweerde buite-egtelike verhouding..
Terwyl Woods die gerugte ontken, het sy stilswye oor die ongeluk opinies by bewonderaars sowel as kritici laat opvlam.
Meer as 4 000 boodskappe is op Woods se webwerf geplaas in reaksie op sy verklaring Sondag en sy aankondiging Maandag dat hy nie aan die Chevron-toernooi gaan deelneem nie.
“Wanneer gaan jy uitkom en vir ons laat weet wat regtig gebeur het en hoekom jy gevoel het dis nodig om jou motor in die middel van die nag te bestuur?” het een boodskap gelees, skaars vyf minute nadat Woods die aankondiging geplaas het.
“Jou reputasie word verseker bevraagteken. Spaar dit voordat dit in die toilet beland.”
“Tiger, Tiger, Tiger... Jy het jou lip bebloed en nou onttrek jy uit jou eie toernooi? Vergeet van wat, hoekom en hoe die ongeluk gebeur het. Jy gaan een of ander tyd die media in die gesig moet staar en nou is beter as later.”
Voodoomagig5 het Woods verdedig: “Almal, los Woods uit! Sy privaat lewe is sy privaat lewe. Ons almal ken hom en is lief vir hom as 'n gholfspeler. As ‘n gholfspeler het niks verander nie en almal moet hulle neus uit sy sake hou!”
- AFP