Korea wink al vir 5 SA atlete
2011-03-13 09:51
Johannesburg - Vyf Suid-Afrikaanse atlete het reeds paspoorte na die wêreldkampioenskappe einde Augustus in Daegu, Suid-Korea... en as dit van die Matie-ghoeroe Mario Smit afhang, is dit een van hierdie mooi dae sewe.
Een van die drie top-atlete in Smit se afrigtingskamp in Stellenbosch, die 400-hekkiesbreker Cornel Fredericks, het die afgelope Donderdag in Bellville met ’n 49.33 die Daegu-kwalifiserende vereiste (49.40) oortref.
Dít kom nadat LJ van Zyl ’n week tevore met ’n asemrowende SA rekord van 47.66 dié item aan die brand gehardloop het.
Ook in Smit se kamp is die verspringers Luvo Maniyonga en Janice Josephs. Die junior wêreldkampioen Maniyonga het in Bellville met ’n spog-sege van 8.00 teenoor Khotso Mokoena se 7.97 afgeskop, terwyl Josephs by dieselfde Geelbladsye-byeenkoms op 6.29 geland het.
In sowel Maniyonga as Mokoena se visier is die Daegu-vereiste van 8.20, terwyl Josephs nog ’n ent weg is van die vereiste 6.75 hoewel sy nou anderdag háár seisoen met ’n 6.51 ingelui het; dít kom skaars twee weke nadat sy haar by haar nuwe afrigter, Smit, aangesluit het.
Smit sê Saterdag aan Sport24: “Die seisoen is nog baie jonk, maar ons werk kliphard daaraan om ál drie reeds in die SA seisoen vir Daegu te laat kwalifiseer.
“Ek is doodtevrede met Cornel se vordering.
“Ja, LJ het ’n verskriklike gaping tussen hom en Cornel oopgemaak –maar dit bekommer my nie. Cornel is nog jonk en ek wil hom en Luvo se loopbane stelselmatig opbou.
“Ek glo nie daaraan om ’n perske vroeg pap te druk nie. Hul loopbane lê oop voor hulle –en ons mikpunt is bloot om hulle stadig maar seker aan top-kompetisie gewoond te maak en te brei vir latere kragmetings.
“Cornel se persoonlike beste (die 48.79 waarmee hy verlede jaar in Kenia tweede ná LJ op die Afrika-kampioenskappe was) is uiteraard ook in ons visier, terwyl Luvo natuurlik al met ’n persoonlike beste van 8.19 ’n haarbreedte van die vereiste af gedraai het.”
Hy twyfel nie dat Josephs (29) ’n tweede asem gaan kry in ’n loopbaan wat tot nou effe wipplank gery het nie.
“Daar sit nog baie in haar,” sê Smit oor Janice, wat vier jaar gelede met ’n 6.79 in Algerië ontplof het.
Benewens Van Zyl en Fredericks, is Suid-Afrika se ander Daegu-kwalifiseerders in dié melkbaard-seisoen die spiesgooier Robert Oosthuizen en 800-brekers Mbulaeni Mulaudzi en Caster Semenya, wat albei as wêreldkampioene outomaties kwalifiseer.
Intussen het SA atletiek in Bellville sy 53ste droommyler gekroon, toe die hindernis-man Ruben Ramolefi in 3:59.69 gewen het.
Dit was die eerste SA myl in onder 4minute in ses jaar.
Dit volg 47 jaar nadat Div Lambrecht dit doer in 1964 die eerste keer vermag het.
Johan Fourie se SA rekord van 3:50.82 vergeel al sedert 1987 in die Suid-Afrikaanse rekordboeke.
Die wêreldrekord (3:43.13 deur die Marokkaan Hicham El Guerrouj) staan al sedert 1999 in ’n eens-glorieryke item, wat deesdae maar baie selde op groot byeenkomste aangebied word en deur sy metrieke boetie, die 1500, vervang is.