Kimberley kry R3 milj. skaatspark
2011-05-03 12:39
Kaapstad - 'n Skaatspark van R3 miljoen gaan in Kimberley gebou word nadat Suid-Afrika gekies is om 'n been van die wêreld se rykste skaatsplank-kompetisie aan te bied.
Die Maloof Money Cup, met prysgeld ter waarde van $3 miljoen (byna R20 miljoen), sal vir die eerste keer in die geskiedenis een van sy vier bene buite Amerika aanbied.
Die kompetisie se mede-stigter, Joe Maloof, het gesê Suid-Afrika is die perfekte plek omdat dit die Wêreldbeker-sokkertoernooi aangebied het.
"Vanaf die eerste dag wat ons met die kompetisie begin het, was die idee om dit internasionaal uit te brei," het Maloof gesê.
Die Maloof Money Cup is in 2008 deur Joe en Gavin Maloof gestig, wie se familie mede-eienaars van die Amerikaanse basketbalspan Sacramento Kings en die Palms Casino in Las Vegas is.
Die eerste been van die kompetisie sal vanjaar in Junie in New York plaasvind. Die tweede en derde been onderskeidelik in Washington en Kimberley. En die vierde been in Kalifornië.
Die skaatspark in Kimberley sal langs die stad se nuwe konferensie sentrum gebou word.
Met al die fasiliteite ingesluit sal die skaatspark 100 000 m² beslaan.
"Dit (skaatspark) sal deel word van ons provinsie se nalatenskap en sal Kimberley 'n reuse hupstoot as toeriste bestemming gee," het Sharron Lewis, uitvoerende hoof van Noord Kaap toerisme gesê.
Lees verder.
- TimesLive