Kim uit met seer enkel
2011-06-16 08:27
Londen – Rafael Nadal van Spanje, die manskampioen, en die vroue se nommer een, Caroline Wozniacki van Denemarke, is die twee topgekeurdes vir Wimbledon.
Die keurlyste vir aanstaande week se tennistoernooi is Woensdag hier bekend gemaak.
Die vroue se keurlys moes Woensdag met die onttrekking van Kim Clijsters gewysig word.
Die Belg was tweede gekeur. Organiseerders het gesê sy sal weens ’n voetbesering nie in aksie wees nie.
Sy het weer las van ’n ou enkelbesering.
“Ek is teleurgesteld. Ek het my voet in die toernooi in ‘S-Hertogenbosch beseer,” het Clijsters in ’n verklaring gesê.
“Ek is uiters gefrustreer dat dit juis nou voor een van my gunsteling toernooie moes gebeur. Ek het egter nie ’n keuse nie.”
Vera Zvonareva van Rusland is nou tweede gekeur, terwyl die wenner van die afgelope Franse Ope, Li Na van China, derde gekeur is.
Die vroue-kampioen, Serena Williams van Amerika, is ná die wysiging sewende gekeur.
Haar sege verlede jaar was haar 13de Grand Slam-titel, maar toe gaan staan en trap sy op gebreekte glas.
Dit het tot bloedklonte in haar longe gelei. Sy het in die tyd dat sy nie in aksie was nie, tot die 26ste plek op die ranglys uitgesak.
Sy en haar suster Venus het hul terugkeer tot die spel vandeesweek in die Eastbourne-toernooi gemaak. Venus het tot die 33ste plek ná ’n heupbesering uitgesak.
Sy het Wimbledon al vyf keer gewen. Serena het dit ook al vier keer reggekry. Die vyf topgekeurdes tussen die mans is dieselfde spelers wat die eerste vyf plekke op die wêreldranglys beklee.
Nadal en die Switser Roger Federer het die laaste agt jaar gekombineer om met die titel weg te stap. Federer was van 2003 tot 2007 en in 2009 die kampioen.
Nadal het in 2008 gewys hy is nie net ’n kleibaanspeler nie, waarna hy in verlede jaar se eindronde met die Tsjeg Tomas Berdych afgereken het.
Die toptien op keurlys is:
Mans:
1.Rafael Nadal (Sp),
2.Novak Djokovic (Serw),
3.Roger Federer (Swi),
4.Andy Murray (Br),
5.Robin Soderling (Swe),
6.Tomas Berdych (Tsjeg),
7.David Ferrer (Sp),
8.Andy Roddick (VSA),
9.Gael Monfils (Fr),
10. Mardy Fish (VSA).
Vroue:
1.Caroline Wozniacki (Dene),
2.Vera Zvonareva (Rus),
3.Li Na (China),
4.Victoria Azarenka (Belo),
5. Maria Sharapova (Rus),
6.Francesca Schiavone (It),
7.Serena Williams (VSA),
8.Petra Kvitova (Tsjeg),
9.Marion Bartoli (Fr),
10.Samantha Stosur (Aus).
– Sapa-AFP