Khotso mik na ‘grote’
2011-08-05 09:40
Johannesburg – Die Olimpiese medaljewenner Khotso Mokoena dreig die hele jaar al om daardie een groot sprong te spring en dalk ook sommer sy Suid-Afrikaanse verspring-rekord van 8.50 m te verbeter.
Dalk gebeur dit Vrydagaand op die Diamantliga-byeenkoms in Londen.
Mokoena het juis in Parys, die vorige keer toe hy aan ’n Diamantliga-byeenkoms deelgeneem het, bewys hy is besig om sy beste peil te bereik en dat hy steeds ’n vegter is vir wie die woord opgee nie bestaan nie.
In Parys het hy uiters swak begin. Hy kon nie een keer met sy eerste vier spronge daarin slaag om verder as 8 m te spring nie en dit wou lyk asof hy laaste sou eindig.
Maar toe laat Mokoena almal skielik regop sit toe hy met sy vyfde sprong die maatband tot 8.25 m laat rek het. Met sy volgende sprong het hy 8.15 m gespring.
Mokoena het weliswaar nie gewen nie. Hy was vierde maar die boodskap aan sy teenstanders was duidelik: Moet my nie afskryf nie.
Vrydagaand hervat hy sy tweestryd met Irving Saladino, Panama se Olimpiese kampioen, en Mitchell Watt van Australië wat tot dusver met die beste afstand van 8.54 m spog. Chris Thomlinson van Brittanje wat al 8.35 m gespring het, neem ook deel.
Volgens Mokoena gaan alles daarvan afhang van hoe hoe hy vastrap.
“Ek weet dat as ek die plank reg slaan, gaan ek ’n grote spring.
“Maar as dit nie gebeur nie, is dit nie die einde van die wêreld nie, want ek het net één doelwit en dit is om op die Wêreldbyeenkoms vir Suid-Afrika ’n medalje wen.
“Ek is dit aan myself verskuldig.”
Vir die jongste sportnuus volg Nuus24Sport op Twitter.
– Sport24