Kevin kook wéér tot in kwarteindstryd
2011-10-28 09:00
Johannesburg. – Suid-Afrika se voorste tennisspeler, Kevin Anderson, het die derde keer in slegs vier weke tot die kwarteindronde van ’n ATP-toernooi deurgedring.
Dit was danksy ’n oorwinning eergister in die Erste Bank-ope in Wene oor die Ciprioot Marcos Baghdatis.
Anderson was met 6-2, 7-6 (7/5) baas nadat hy ’n hewige aanslag van die voormalige nr. 8-speler op die wêreldranglys in die tweede stel afgeweer het.
Die?gebore?Johannesburger het net meer as 90 minute nodig gehad om met Baghdatis af te reken. Ná ’n maklike eerste stel waarin Anderson drie keer deurgebreek het en 70% van die punte op sy teenstander se tweede afslaan gewen het, het Baghdatis teruggeveg in die tweede stel en was hy in sommige aspekte Anderson se gelyke op die baan.
Die verskil was die Suid-Afrikaner se afslaan – hy het in die tweede stel nege kishoue geslaan – en sy koelkop-houding onder druk in ’n taai valbylstryd.
Anderson het verlede week ook tot die kwarteindronde van die Stockholm-ope deurgedring, maar teen die eindelike wenner, Gael Monfils van Frankryk, vasgeval. Twee weke voor dit, in China, was die Kroaat Marin Cilic te sterk vir hom in die kwarteindronde.
Anderson het dus heelwat motivering voor nog ’n moeilike kwarteindstryd. Hy sal teen die wenner van vandag se wedstryd tussen die tweemalige verdedigende kampioen, Jurgen Melzer van Oostenryk, en die Spanjaard Guillermo Garcia-Lopez speel.
’n Sege sal hom die eerste keer sedert Januarie tot die halfeindronde van ’n toernooi laat deurdring.
- Die gewese Amerikaanse Ope-kampioen Juan Martin del Potro, wat die Duitser Philipp Petzschner met 6-3, 6-4 geklop het, het ook tot die volgende ronde deurgedring. Dit is die sewende keer vanjaar dat hy die kwarteindronde van ’n toernooi haal.
Del Potro, wat nog in die wedloop is om een van drie oorblywende plekke in die ATP se jaareind-toernooi, moes vier breekpunte in die eerste stel afweer, maar is nie in die tweede stel onder druk geplaas nie.
Hy sal volgende teen óf Tommy Haas van Duitsland óf die Sloweense kwalifiseerder Aljaz Bedene speel.
Vir die jongste sportnuus volg Nuus24Sport op Twitter.
– Sport24