Kevin Anderson en afrigter se paaie skei

2012-12-07 11:30

Kaapstad – Suid-Afrika se top-gekeurde tennisspeler, Kevin Anderson, en sy afrigter van byna drie jaar, Louis Vosloo, se paaie gaan skei.

Anderson, wat tans 37ste op die wêreldranglys is, het twee ATP-toernooie gewen sedert hy in April 2010 saam met Vosloo begin werk het.

"Dit was 'n wonderlike ervaring om saam met Louis te werk," het die 26-jarige Donderdag aan die Tennis World-webtuiste gesê.

"Ek voel dat ek baie verbeter het onder sy leiding en sal hom altyd as afrigter en vriend respekteer. Ek wens Louis alles van die beste toe vir sy toekomsplanne," het Anderson gesê.

Vosloo sê daar is geen kwade gevoelens tussen hom en Anderson nie.

"Ons het baie van mekaar geleer en sal goeie vriende bly," het hy bygevoeg.

Anderson gaan Suid-Afrika in die Hopman-beker saam met Chanelle Scheepers vanaf 29 Desember tot 5 Januarie in Perth verteenwoordig.

Vir die jongste sportnuus volg Nuus24Sport op Twitter.

– Sport24