Kevin 3de SA'ner in kwarteind
2011-02-04 08:16
Johannesburg - Amper ’n handvol Suid-Afrikaners in die kwarteindronde van die Suid-Afrikaanse Ope-tennistoernooi is omtrent so ongehoord soos die Wêreldbeker-trofee vir die nasionale krieketspan.
Tog is dít die geval hier by Montecasino nadat Kevin Anderson hom Donderdagmiddag by sy landgenote Rik de Voest en Izak van der Merwe in die laaste agt aangesluit het.
Suid-Afrika se topspeler het net ’n uur en agt minute nodig gehad om Dudi Sela van Israel met 6-2, 6-4 in die tweede ronde uit te skakel.
Anderson, die vierde gekeurde, het op sy afslane gekonsentreer en hy het 13 kishoue afgeblits.
Deurbrake in die sesde en agtste potte was genoeg om die eerste stel aan hom te besorg. In die sesde pot het twee dubbelfoute van Sela die wêreld vir Anderson veel makliker gemaak.
Anderson het sy afslaan die enigste keer in die wedstryd in die tweede pot van die tweede stel verloor, maar dadelik die skade herstel deur terug te breek.
Hy het dié dosis in die tiende pot herhaal en op sy tweede wedstrydpunt sake afgehandel toe die Israeli ’n voorarmhou teen die net vasgeslaan het.
Dit was die eerste keer in drie probeerslae dat Anderson met Sela kon afreken.
“In die verlede het ek nogal heelwat probleme met sy afslane gehad.
“Hy slaan nie hard af nie, maar plaas die bal uitstekend. My plan was om veel meer aanvallend op sy afslaan te wees en dit het gewerk.
“Hy het selfs ’n paar dubbelfoute begaan,” het Anderson gesê. “Ek het goed herstel nadat ek my afslaan vroeg in die tweede stel verloor het, maar in die geheel het ek goed gevoel en was gemaklik met my spel.”
Anderson se teenstander in vandag se kwarteindronde is die Slowaak Karol Beck, wat aanvanklik kwaai gesukkel het om Go Soeda van Japan baas te raak. Soeda het die eerste stel met 6-3 gewen voordat Beck die volgende twee met 7-5, 6-0 agter sy naam geskryf het.
Nadat Beck sake gelyk gemaak het deur die tweede stel te wen, het die Japanner se aanspraak soos botter op ’n warm Karoo-pad gesmelt.
Anderson het nog nooit voorheen teen Beck, 101ste op die wêreldranglys, gespeel nie.
Die Suid-Afrikaner sê hy hoop die ondersteuning van die tuisskare sal hom help om die halfeindronde te haal.
In ’n herhaling van hul Davisbekerstryd in Oktober 2009 kom Rik de Voest teen die Indiër Somdev Devvarman te staan, terwyl Van der Merwe met die Duitser Simon Greul kragte sal meet.
Bly op hoogte van al die jongste sportnuus deur Nuus24Sport op Twitter te volg.
- Sport24