Kar tref SA atleet terwyl sy oefen
2011-07-30 07:38
Die roekelose gejaag van motoriste in Ruimsig, Roodepoort, moet einde kry.
So het René Kalmer, Suid-Afrikaanse halfmarathon-kampioen, gesê nadat Irvette van Blerk, haar oefenmaat en SA 10 km-kampioen, eergister deur ’n motoris omgery is.
Skaars drie maande vantevore is Juan van Deventer, Olimpiese 1 500-finalis, ’n paar blokke verder aan ook raak gery terwyl hy aan die oefen was.
Van Blerk was gelukkig. Behalwe vir ’n stywe nek, ’n stywe heup, ’n groot knop op die kuit, ’n sny op die voorkop en ’n paar verlore velle het sy dit oorleef.
Van Deventer het sy knie in die ongeluk gebreek en daarmee saam is hy die kans ontneem om vir die Wêreld-atletiekbyeenkoms in Daegu, Suid-Korea, te kwalifiseer.
Kalmer het gesien hoe Van Blerk raak gery word.
“Ons het aan die regterkant van die pad gehardloop sodat ons die verkeer van voor af kon sien aankom. Irvette was besig met fartlek-oefeninge (spoedoefeninge) en was daarom voor my.
“Ek het besef sy is in groot moeilikheid toe ek sien hoe die bestuurder in ’n wit Golf-motor by ’n ander motoris verbyjaag.
“Die volgende oomblik het ek gesien hoe die motor Irvette tref.
“Toe ek by haar kom, het sy in die middel van die pad gelê. Haar gesig was vol bloed. Ek het regtig geskrik toe ek haar sien.”
Volgens Van Blerk het sy net skielik ’n stamp gevoel en toe, om haar eie woorde te gebruik, het sy soos ’n domino-blokkie vorentoe geval.
“Ek het nie besef wat gebeur het nie. My eerste reaksie toe ek tot verhaal gekom het, was om te voel of enige van my bene gebreek is. Ek was regtig verlig toe ek agterkom dat daar nie dadelik met my hospitaal toe gejaag moet word nie.
“My redding was waarskynlik dat die motoris begin rem trap het net voordat hy my getref het.
“Ironies genoeg het ek vroeër die dag by Juan (van Deventer) gaan inloer.”
“Ek wil ’n petisie laat opstel waarin ek die verkeersowerheid wil versoek om spoedwalle op Ruimsig se paaie aan te bring. Hopelik sal dit motoriste dwing om dan stadiger te ry,” het Kalmer gesê.
– Volg Nuus24 op Twitter.
- Beeld