Kapenaar deel kollig met Woods
2009-11-13 12:04
Marizanne Kok
Johannesburg - Selfs Tiger Woods is nie immuun teen verkeersknope nie, maar anders as die meeste mense is dit vir hom nie noodwendig die begin tot ’n slegte dag op kantoor nie.
Die wêreld se beste speler het gisteroggend vroeg buite die Kingston Heath-gholfbaan in Melbourne in ’n verkeersknoop beland, wat deur sy teenwoordigheid veroorsaak is. Maar desondanks het hy die eerste ronde van die Australiese Meesterstoernooi as een van die voorlopers voltooi.
Woods het sewe voëltjies en ’n brouhou vir ’n telling van 66 aangeteken. Saam met hom aan die voorpunt is Branden Grace, die enigste Suid-Afrikaner in dié toernooi, en die Australiër James Nitties.
Die Amerikaner het ’n kans gehad om as die alleen-voorloper te eindig, maar het sy bal op die laaste putjie tussen die bome ingeslaan en van daar af ’n brouhou aangeteken.
Woods se eerste ronde in Australië in 11 jaar is weer deur derduisende pare oë gevolg soos dit ook in sy oefenronde en die pro-am-toernooi die geval was. Hy het agterna met groot lof van die toeskouers gepraat.
“Ek dink hulle was vandag (gister) wonderlik,” het hy volgens Sapa gesê. “Almal was vanselfsprekend opgewonde oor ons groep (wat die tuisgunstelinge Craig Parry en Rod Pampling ingesluit het) en was baie beleef.”
Woods het die toeskouers as “goed ingelig” beskryf. Hy was beïndruk dat hulle net sy goeie houe toegejuig en die slegte oomblikke met die nodige stilswye begroet het.
Vir Suid-Afrikaners is die naam Grace bo-aan die telbord goeie nuus. Hy is ’n voormalige Suid-Afrikaanse amateurkampioen.
Dié 21-jarige Suid-Kapenaar het die eerste nege putjies in 32 houe voltooi, danksy vier voëltjies tussen die sesde en negende putjies.
Oor die tweede nege het hy nog twee voëltjies bygevoeg.
- Die Burger