Kan Rafael die rekord verbeter?
2010-07-06 09:46
Kaapstad - Daar is min twyfel dat Rafael Nadal die vermoë het om Roger Federer se Grand Slam-rekord te ewenaar en selfs te verbeter.
Die vraag is of Nadal se liggaam hom gaan toelaat om dié prestasie te vermag.
Die 24-jarige Spanjaard het sy status as die voorste tennisspeler ter wêreld bevestig toe hy Sondag sy tweede Wimbledon-titel verower het. Dit was sy agtste Grand Slam-titel.
Nadal kort nog net die Amerikaanse Ope vir sy loopbaan-Grand Slam en nog agt Grand Slam-titels om Federer se rekord te ewenaar.
Nadal het die grootste deel van die 2009-seisoen misgeloop weens seningontsteking in sy knieë. Vanjaar moes hy hom in die kwarteindronde van die Australiese Ope onttrek toe die probleem wéér opgevlam het. Tydens Wimbledon is hy ook behandel.
Nadal speel vanjaar heelwat minder toernooie. Hy kies dié wat belangrik en nodig is. Waar hy vorige jare maklik vyf kleibaan-toernooie voor die een op Roland Garros sou speel, was hy vanjaar in net die drie Meesterstoernooie in aksie.
Hy het ook reeds gesê dat hy ná Wimbledon vir ’n paar weke gaan laag lê om te rus en behandeling vir sy knieë te kry.
Nadal het nie enige noemenswaardige swak plekke in sy mondering nie...dalk sy afslaan, hoewel dit goed genoeg is.
Nadal is een van die spelers wat alles gee met elke punt. Sy liggaam word gestraf met elke wedstryd wat hy speel. In teenstelling daarmee speel Federer die tipe spel waar hy sy liggaam spaar.
Wat ouderdom betref, is tyd beslis aan Nadal se kant om 16 en selfs meer titels te wen, maar of sy knieë en die res van sy liggaam gaan hou is ’n ope vraag.
Nadal se fokus is nou eers op ’n loopbaan-Grand Slam eerder as Federer se rekord.
“Nog agt? Dit is té ingewikkeld...té taai,” het Nadal aan Sapa-AP oor Federer se rekord gesê.
Volgens hom is die Amerikaanse Ope, wat op 30 Augustus begin, nou sy vernaamste doelwit.
Nadal kon nog nooit verder as die halfeindronde van dié hardebaan-toernooi vorder nie.
Bly op hoogte van al die jongste sportnuus deur Nuus24Sport op Twitter te volg.
- Sport24