Igesund 'teleurgesteld' in Bafana
2013-01-09 08:03
Kaapstad – Bafana Bafana het Dinsdagaand in Kaapstad-stadion met 0-1 die onderspit gedelf teen Noorweë se onervare span.
Gordon Igesund se span het amper die hele wedstryd oorheers, maar kon net nie die bal in die doelhok kry nie, ten spyte van al die geleenthede wat op die aanval geskep is.
Die Suid-Afrikaanse doelwagter, Ithumeleng Khune, was vir die grootste deel van die wedstryd ‘n toeskouer.
Tog het Noorweë gebruik gemaak van een van hul minse kanse toe hul kaptein, Tarik Elyounoussi, kort voor halftyd die besoekers die voortou laat neem het.
Igesund het sy teleurstelling met die span se vertoning uitgespreek.
“Natuurlik is ek teleurgesteld, want ek het gedink ons het regtig goed gespeel. Ons het baie geleenthede geskep. Ek kan sien ons verbeter. Daar is nog baie werk om te doen, maar ons sal dit reg kry voor die eerste wedstryd (van die Afrikabeker-toernooi),” het Igesund na die wedstryd gesê.
Igesund se span begin hul Afrikabeker-aanslag op 19 Januarie teen die Kaap Verdiese Eilande in Soweto.
– Vir die jongste sportnuus volg Nuus24Sport op Twitter.
- SAPA
