IAAF vra atleet vir geslagstoets
2009-08-20 06:16
Wilhelm de Swardt
Pretoria – Die IAAF, die internasionale atletiekbeheerliggaam, het gevra dat Caster Semenya, Suid-Afrika se nuwe 800m-ster, ’n geslagstoets ondergaan.
Nick Davies, ’n woordvoerder van die IAAF, het gesê daar is drie weke gelede al ’n versoek aan Atletiek Suid-Afrika (ASA) gestuur om Semenya vir ’n geslagstoets te stuur en daar is glo reeds daarmee begin.
Die versoek is gerig nadat sy op die Afrika-junior-byeenkoms in Mauritius die 800 in 1:56.72 gewen het – die vinnigste tyd vanjaar vir ’n vrou tot Semenya se blitstyd Woensdagaand.
Met dié vertoning het sy haar persoonlike beste tyd met amper 4 sek. verbeter.
“As die IAAF wil ons seker wees dat Semenya in alle opsigte ten volle ’n vrou is,” het Davies in ’n verklaring gesê.
“Die toets is ’n erg ingewikkelde proses en daarom verwag ons die uitslae eers oor ’n paar weke.
“Tot dan is daar geen rede om Semenya te keer om aan wedlope deel te neem nie.”
Phiwe Mlangeni-Tsholetsane, bestuurder van die Suid-Afrikaanse span, wou nie bevestig of ontken dat Semenya ’n geslagstoets ondergaan nie, maar het gesê: “Daar was geen kullery aan ons kant nie.”
“Ons het Caster as ’n vrou ingeskryf en wil dit graag so hou.
“Ons gewete is skoon.”
Die geslagtoets behels ’n fisieke mediese ondersoek en sluit in verslae van ’n ginekoloog, ’n endokrinoloog, ’n sielkundige, ’n internis en ’n geslagskenner. Dit duur baie lank.
– Beeld