IAAF sê gou oor Oscar
2011-08-16 07:02
Pretoria – Oscar Pistorius, ’n Paralimpiese kampioen, sal aanstaande week op die Wêreld-atletiekbyeenkoms in Daegu, Suid-Korea, dalk net aan die 4x400-aflos mag deelneem as hy wegspring.
James Evans, voorsitter van Atletiek Suid-Afrika, het Maandag gesê dat die Internasionale Vereniging van Atletiekfederasies geen probleem met Pistorius se deelname aan die 400 m het nie, maar hy verwag dat die IAAF voorskriftelik oor die aflos gaan wees.
“Niks is nog finaal nie. Ek wag nog vir ’n antwoord van die IAAF oor Oscar se deelname aan die aflos.”
Volgens Evans gaan alles oor die veiligheid van die atlete. “Daarom verwag ek dat die IAAF daarop gaan aandring dat Oscar net aan die aflos mag deelneem as hy wegspring, want die atlete hardloop dan nog in bane.
“Dinge raak rof van die tweede en derde oorgeë. Gaan kyk hoeveel atlete het op die vorige Wêreldbyeenkoms in Berlyn in die 4x400-aflos geval.
“Die laaste ding wat die IAAF wil hê, is dat Oscar lelik moet seerkry, omdat ’n atleet hom uit die pad stamp. Daar bestaan ’n gevoel dat Oscar makliker as ander atlete sy balans kan verloor.
“Baie atlete is bang dat hulle kan seerkry as hulle reg langs Oscar in die 4x400-aflos moet hardloop en sy ‘lemme’ tref hulle.”
Ampie Louw, Pistorius se afrigter, het gesê hy is verslae oor die nuwe herrie. “Ek kan dit nie verstaan nie. Al wat Oscar nog altyd vra, is ’n regverdige kans om deel te neem, maar dit lyk nie asof dit hom ooit beskore gaan wees nie.
“Oscar wil bitter graag Suid-Afrika help om ’n medalje in die aflos te wen.”
Louw wou nie sê oor wat sal gebeur as Pistorius dié keuse moet maak: Of jy spring weg of jy hardloop nie.
– Sport24
– Bly op hoogte van al die jongste sportnuus deur Nuus24Sport op Twitter te volg