'Hulle beswadder my' – Botha
2013-02-12 08:12
Port Elizabeth – Die Wit Buffel het Maandag heftig ontken dat hy enige verbode middel gebruik het voor sy geveg met die rugbyheld Sonny Bill Williams, berig Beeld.
“Hulle beswadder my. Ek het nie opkikkers gebruik nie,” het Francois Botha gesê.
Hy is erg ontsteld oor gerugte dat hy kwansuis die middels fentermien en bensodiasepien sou gebruik.
“Ek weet ek is onskuldig, daarom het ek vanoggend [Maandag] uit my eie dokter toe gegaan en toetse laat doen.”
Volgens Botha hoop hy om teen môre die uitslae te hê wat hy dan bekend sal maak.
“Ek was in 1995 positief vir verbode middels ná my geveg teen Axel Shulz. Ek weet mos die wêreld hou my van toe af dop, ek sal nooit so ’n kans waag nie,” het hy gesê.
Thinus Strydom, sy promotor, was uit die veld geslaan oor die bewerings.
“Francois is teen die einde van sy loopbaan. Hy sal nie sulke goed waag en dit nog korter laat knip nie,” het hy gesê.
Khoder Nasser, Williams se bestuurder, hou egter vol dat Botha wel skuldig is.
In ’n onderhoud met die TV-kanaal One News het hy gesê hy het die uitslae van die dwelmtoets die dag ná die geveg gekry en toe bekend gemaak. Botha se monsters is glo intussen na die Wêreldboksvereniging se hoofkwartier in Panama gestuur.
– Volg Nuus24Sport op Twitter
