Hitte laat tennissterre sweet
2010-09-02 07:14
New York – Die top-gekeurde in die mans-enkelspel, Rafael Nadal, is kwaai getoets in die eerste ronde van die Amerikaanse Ope-tennistoernooi hier op Flushing Meadows deur die Rus Teymuraz Gabashvili.
Nadal het net drie minute minder as drie ure op die baan deurgebring om die Rus met 7-6 (7/4), 7-6 (7/4), 6-3 te klop.
“Ek verkies om net ’n uur en tien minute te speel, maar in ’n toernooi soos hierdie is geen wedstryd maklik nie,” het Nadal gesê.
In teenstelling met Nadal, het die top-gekeurde vrou, Caroline Wozniacki, gou klaargespeel met Chelsey Gullickson en met 6-1, 6-1 geseëvier. Sy het eers teen middernag op die baan gestap, ná Nadal se wedstryd.
“’n Sege is egter ’n sege, maak nou nie saak watter tyd dit behaal word nie.
“Solank ek wen, is ek tevrede,” het Wozniacki gesê.
In die eerste 32 potte van die Nadal-wedstryd, was daar sewe breekpunte, maar nie een van die spelers kon dit benut nie. Nadal het egter die sleutelpunte in die valbylpotte gewen om die eerste twee stelle syne te maak.
Die eerste keer dat hy op die Rus se afslaan kon deurbreek, was in die sewende pot van die derde stel, met Gabashvili wat ’n voorarmhou teen die net vasgeslaan het.
Gedurende die dag was dit versengend warm en die 14de gekeurde vrou, Maria Sharapova, het stadig begin in haar sege met 4-6, 6-3, 6-1 oor Jarmila Groth van Australië.
“Dae soos dié moet jy maar net vasbyt en maniere vind om te baklei vir ’n sege,” het sy gesê.
Die vierde gekeurde, Jelena Jankovic, het ook albei drie stelle nodig gehad om deur te dring.
“Die hitte het dinge besonder moeilik gemaak, maar ek wou nie daaraan dink nie en het net op die wedstryd probeer fokus,” het Jankovic gesê.
Die Serwiër Novak Djokovic, derde gekeur, het drie uur en 40 minute benodig om sy vriend en landgenoot Viktor Troicki met 6-3, 3-6, 2-6, 7-5, 6-3 uit te skakel.
Bly op hoogte van al die jongste sportnuus deur Nuus24Sport op Twitter te volg.
- Sport24