Hamilton wil vanjaar terugveg
2010-03-09 12:32
London – Die 2008 Formule Een-wêreldkampioen Lewis Hamilton, is gretig om verlede seisoen se slaggate te vermy en dring aan, dat hy geen planne het om teen sy landsgenoot en spanmaat Jenson Button te verloor nie.
Die 25-jarige Engelsman se verdediging van sy titel verlede jaar, het met die eerste wedren reeds ontspoor in 'n McLaren-Mercedes wat ondergemiddeld presteer het.
“Ek beplan nie om te verloor nie," het Hamilton wat wel teen die einde van verlede jaar sterk geëindig het, gesê.
Hamilton, wat die wenner van 11 Formule Een-wedrenne is, was ook gretig om te beklemtoon dat hy ‘n beter verhouding met Button het as met Spanje se tweemalige wêreldkampioen, Fernando Alonso, wat sy spanmaat in 2007 was.
“Hy is uiters professioneel en ek was verbaas oor sy maniere wat wys hy het goeie waardes, het Hamilton oor Button te sê gehad.
“Hamilton het benadruk dat hoewel hy vantevore deur ‘n spanmaat in ‘n wedren geklop is, hy nog nooit ‘n kampioenskap teen een verloor het nie.
Die eerste wedren van die 2010 Formule Een-seisoen skop dié komende Sondag in Bahrain om 14:00 Suid-Afrikaanse tyd af.
- AFP