Grosjean jammer oor Suzuka-ongeluk
2012-10-11 11:30
Suid-Korea – Mark Webber het Donderdag gesê hy aanvaar Romain Grosjean se verskoning nadat die Lotus-renjaer teen hom vasgejaag en sy kanse by die Japanse Grand Prix in die wiele gery het.
Die vurige Australiër se lyftaal by 'n mediakonferensie op die vooraand van die Formule Een-wedren in Suid-Korea, waar Grosjean ook teenwoordig was, het egter voorgestel dat daar steeds kwade gevoelens is.
Grosjean het kort na die wegspring by Sondag se Grand Prix in Suzuka met Webber se Red Bull kontak gemaak.
Die Australiër moes na die kuipe jaag vir herstelwerk en het gevolglik in die negende plek klaargemaak.
Grosjean het later erken dat hy 'n "simpel fout" begaan het en het, nadat hy vanjaar reeds geskors is vir 'n soortgelyke ongeluk, beloof om sy bestuurstyl te verbeter.
Hy het ná die wedren vir Webber om verskoning gevra.
Toe die Red Bull-jaer gevra is of hy die verskoning aanvaar het hy saaklik geantwoord: "Ek het Romain gaan sien, ons het 'n bespreking daaroor gehad. So, ja."
"Al wat ek kon doen was om verskoning te vra. Ek was baie jammer. Dit was simpel van my," het Grosjean gesê.
Webber het na afloop van die wedren woedend gereageer deur te sê Grosjean het dalk weer 'n "vakansie", of skorsing nodig en het sy bestuurstyl as 'n "verleentheid" beskryf.
Vir die jongste sportnuus volg Nuus24Sport op Twitter.
- Sapa - AP
