Groot terugslag vir SA hekkiesloper
2011-09-13 07:02
Pretoria – LJ van Zyl sal nie weer vanjaar aan atletiek deelneem nie.
Hy het Sondag op ’n internasionale byeenkoms in Berlyn sy dyspier só erg beseer dat hy byna nie die 400 m-hekkieswedloop voltooi het nie.
Hy het agtste in ’n tyd van 52.78 s geëindig.
Dié besering beteken dat Van Zyl nie Vrydagaand in Brussel aan die tweede eindronde van die Diamantliga-byeenkoms kan deelneem nie.
“Dit sou lekker gewees het om ’n diamant(-trofee) te wen, maar dit gaan nie gebeur nie, want my dyspier is in sy peetjie. Ek het Sondag sommer ná die eerste 150 meter besef my seisoen is verby.
“Maar ek kla nie. Ek het ’n goeie seisoen gehad waarin ek albei my doelwitte verwesenlik het. Die eerste was om die Suid-Afrikaanse rekord te verbeter en ek wóú ’n medalje op die Wêreld-atletiekbyeenkoms (in Daegu, Suid-Korea) wen.”
Van Zyl het ’n bronsmedalje in die 400-hekkies gewen en was ’n lid van die 4x400-aflosspan wat ’n silwermedalje verower het.
Sy 47.66 s vroeër vanjaar is steeds die vinnigste sover dié seisoen.
Suid-Afrika se atlete het uitgeblink op die Statebondjeugspele wat op die eiland Man gehou is.
Gerhard de Beer het die Suid-Afrikaanse jeugrekord (o.18) in die diskusgooi verpletter met sy wengooi van 67.44 m.
Dit was ook goed genoeg om die goue medalje syne te maak.
Die 4x100-aflosspan (Pieter Conradie, Constant Pretorius, Andries van der Merwe en Bradley Brits) het nie net gewen nie, maar ook die Suid-Afrikaanse rekord tot (41 s) verbeter. Van der Merwe het die 110-hekkies in 13.32 s gewen. Hy het ook goud op die Wêreld-jeugbyeenkoms gewen.
Die ander medaljewenners was: Goud: Morné Moolman (81.53 – spiesgooi), Ruan Combrink (18.57 – gewigstoot), Albert Janki (14.85 – driesprong), Willem van Schalkwyk – 2.03 m). Silwer: Constant Pretorius (53.05 – 400-hekkies). Brons: Katleho Dyoyi (5:56.91 – 2 000-hindernis), Jan-Louw Kotze (62.90 – diskusgooi).
– Sport24
– Bly op hoogte van al die jongste sportnuus deur Nuus24Sport op Twitter te volg