Giro stuur af op Seinheuwel-riller
2010-03-12 09:27
Eunice Visagie
Paarl - Dié wat nie senuwees van staal het nie, moet eerder vandag wegbly van Seinheuwel, want die geveg om plekke op die wennerspodium van die Giro del Capo het in ’n riller-stryd ontaard.
Burry Stander (Specialized) is steeds die algehele voorloper ná die derde skof (171 km) van dié fietstoer. Hy het gister ’n naelbyt-naelrit teen Hanco Kachelhoffer (Mescheme) verloor. Die wentyd was 4 uur, 28 minute en 2 sekondes.
Stander is nou net 10 sekondes voor Kachelhoffer. David George (safindit.co.za) is 14 sekondes en Kevin Evans (MTN-Energade) 15 sekondes agter Stander.
Almal onder die voorlopers is boonop goeie tydtoetsjaers. Evans is die huidige Suid-Afrikaanse kampioen, terwyl George die rekord hou vir die vinnigste klim teen Seinheuwel uit. Hy het 12 minute en 30 sekondes nodig gehad om die 5,5 km af te lê.
Stander was Donderdag vol lof vir sy spanmaats.
“Dit is danksy my spanmaats (Christoph Sauser, Craig Paul en Ben-Melt Swanepoel) dat ek steeds die pienk trui dra,” het die 22-jarige Stander gesê.
“Hulle het baie hard gewerk en net MTN het saam met ons gewerk om die jaers wat weggebreek het terug te trek. David George se span het geweier om te help.”
Oor vandag se heuwelklim is Stander versigtig optimisties.
“Ek dink die klim sal my goed pas en ek is nie ’n slegte tydtoetsjaer nie. Ek was vierde op vanjaar se SA byeenkoms. Ek was oor 40 km net een minuut stadiger as Kevin. Ek gaan moet uithaal en wys. Die voorsprong wat ek het, is omtrent niks.”
Evans is egter ook optimisties oor sy kanse. Hy het dit vooraf duidelik gestel dat hy glo in sy kanse om te wen as hy met die heuwelklim nog tussen die voorlopers tel.
Hy is steeds die bobaas van die berge en Malcolm Lange (Medscheme) die voorloper in die puntekompetisie.
Vandag se laaste skof begin om 09:30 in Kampsbaai.
Intussen het Lance Armstrong onthul dat hy sy bes gaan doen om toe te sien dat sy spanmaat Daryl Impey Sondag se Argus-wedren wen.
Daar is vroeër gemeen dat Armstrong net vir liefdadigheid sou ry, maar hy het toestemming gekry om saam met die elite-jaers weg te spring.
- Sport24