Giro del Capo het vanjaar nuwe dimensie
2010-03-09 09:06
Eunice Visagie
Kaapstad - Om ’n wenner vir vanjaar se Giro del Capo te voorspel, is iets wat net die heel dapperste fietsrykenners sal doen.
Die Giro begin vandag in Wellington en eindig net meer as 400 km later op Seinheuwel hier in die Moederstad.
Nadat verlede jaar elke dag in afsonderlike wedrenne gejaag is, is dit vanjaar weer ’n nasionale toer.
Die meeste van die voorste jaers in die land sal in aksie wees.
Van die gunstelinge is Nick White, Hanco Kachelhoffer (albei Medscheme), David George, Jacques Janse van Rensburg (DCM) en Kevin Evans (MTN-Energade).
George het al verskeie kere vantevore die Giro gewen, terwyl Kachelhoffer en Janse van Rensburg al gewys het waartoe hulle in ’n meerdaagse toer in staat is.
Dit is veral Evans wat die res van die bondel met valkoë sal dophou.
Sy peil is uitstekend. Hy het vanjaar reeds die Suid-Afrikaanse tydtoets-wedren gewen, hy is wéér die Suid-Afrikaanse marathon-bergfietskampioen en het die naweek saam met sy Cape Epic-maat, Alban Lakata, die bergfietstoer Sani2c oor drie dae gewen.
“Ek voel geen druk nie. Ek dink dit is te wagte dat daar dié is wat dink ek het ’n goeie kans, maar ek voel geen eksterne druk nie,” het Evans gister gesê.
“Ek het egter natuurlik verwagtinge en ek sal dit baie graag wil wen.
“Die roete pas my en vanjaar gaan die Giro ’n nuwe dimensie hê met dié dat daar geen spanradio’s gebruik mag word nie.
“Jaers sal dus nou vir hulself moet dink.”
As bergfietsryer is Evans gewoond hieraan.
“Dié jaers wat nie vir hulself kan dink nie, gaan die meeste geraak word en dit gaan beslis die toer beïnvloed.”
Vir Evans is dit die belangrikste om nog ’n aanspraakmaker te wees wanneer die laaste skof – heuwelklim oor 5,5 km van Kampsbaai na Seinheuwel – aanbreek.
“Nadat ek die Suid-Afrikaanse tydtoets-ren gewen het, het ek natuurlik selfvertroue vir ’n tydtoets en ek gaan die Suid-Afrikaanse trui aanhê, wat nogal spesiaal gaan wees.”
Skofte vir Giro del Capo: VANDAG: Wellington, 106 km. WOENSDAG: Durbanville, 143 km. DONDERDAG: Paarl, 171 km. VRYDAG: Seinheuwel, 5,5 km
- Beeld