Giniel ruil vierwiel vir twee wiele

2011-04-14 15:01

Kaapstad - Die voormalige wenner van die Dakar Giniel de Villiers gaan weer aan 'n uithou-wedren deelneem, maar die keer sal dit op 'n bergfiets wees.

De Villiers (39) gaan met die voormalige internasionale driekamp-atleet Bobby Behan saamspan om aan die Subaru Sani2c vanaf 19 tot 21 Mei deel te neem.

Dié gewilde driedaagse bergfietstoer bestaan uit 650 spanne wat 'n roete vanaf Underberg in die suide van KwaZulu-Natal deur die Umkomaas-riviervallei tot by die kusdorp van Scottburgh moet aflê.

Die Stellenboscher het gesê hoewel hy bloot ingeskryf het om die bergfietstoer te geniet, is daar vriendelike wedywering tussen hom en sy Ierse spanmaat. Die twee het in Stellenbosch ontmoet waar Behan vir internasionale kompetisies voorberei het.

De Villiers en Behan sal onder die Specialized-vaandel deelneem.

Vir meer inligting besoek www.sani2c.co.za of volg sani_scoop op Twitter.

- Sport24