Gillette onttrek van Woods
2009-12-12 23:18
New York – ‘n Reuse-borg van Tiger Woods gaan hom uit hulle advertensies uitfaseer terwyl die gholfster tyd afneem om aan sy persoonlike lewe te werk.
“Terwyl Tiger ‘n breuk van die publieke oog neem, sal ons sy behoefte aan privaatheid respekteer deur sy rol in ons bemarking te beperk,” het Gillette Saterdag gesê.
Hierdie aankondiging is die eerste van Woods se borge wat aandui dat hulle hulself van Woods gaan onttrek.
Die aankondiging kom ‘n dag nadat Woods bekendgemaak het dat hy vir ‘n onbepaalde tyd van gholf en die publiek gaan onttrek om aan sy huwelik te werk.
Woods is die gesig van handelsname soos AT&T, Accenture en Nike.
Die ondersteuning wat hy van verskeie handelsname kry het hom gehelp om die eerste sportster te word om $1 biljoen (R7,5 miljard) te verdien.
Nike, wat hul $650 miljoen (R4,9 miljard) gholfbesigheid om Woods gebou het, het laat Vrydag gesê dat hulle sy besluit ondersteun.
AT&T het gesê dat hulle hul verhouding met Woods evalueer.
Woods sal stelselmatig uit Gillette se televisie en druk-advertensies, sowel as ander geleenthede wat die twee verbind, gehaal word, het Gillette woordvoerder Damon Jones gesê.
“Dit is in ondersteuning van sy behoefte om uit die publieke oog te kom en ons gaan hom ondersteun deur hom te help om ‘n laer profiel te handhaaf,” het hy gesê.
- Sapa-AP