Gholfspeler geskors oor dwelms
2009-11-04 10:04
Sjanghai – Tiger Woods het Woensdag gesê dat dit jammer is dat die Amerikaanse PGA-speler, Doug Barron, positief vir dwelms getoets het, maar hy is ten gunste van die beleid wat teen dwelms in die sport is.
Barron is Maandag deur die Amerikaanse PGA Toer vir ‘n jaar geskors nadat gholf se trotse reputasie as ‘n sport vry van dwelms deur die modder gesleep is.
Dit was die sport se eerste skorsing as gevolg van dwelmgebruik.
Die PGA, wat verlede Julie ‘n beleid teen dwelms aangeneem het, het die skorsing onmiddellik van toepassing gemaak sonder verdere opmerkings.
“Ek het eers vandag daarvan gehoor,” het Woods, wat in Sjanghai is vir die WGC-HSBC-kampioenskappe, gesê.
“Dit is jammer, maar dit is ook een van die redes hoekom ons die beleid het, om seker te maak dat niemand iets doen wat onvanpas vir die sport is nie. Dit is fantasties dat ons die beleid in plek het.”
Daar is nie bekendgemaak wat die middel was wat Barron gebruik het nie.
“Die hele idee is om ons sport skoon te hou,” het Woods bygevoeg.
“Dit is die idee en dit is hoekom ons die beleid geskep het. Dit was nou uitgevoer en ongelukkig het een speler nie die by die beleid gehou nie.”
Die beste einde wat Barron in ‘n PGA-toernooi behaal het was ‘n derde plek in die 2005 Byron Nelson Kampioenskap.
“Ek wil verskoning vra vir enige negatiewe siening van die toer of sy spelers as gevolg van my skorsing,” het Barron in ‘n verklaring wat deur die PGA uitgereik is gesê.
“Ek wil hê my mede-toerlede en aanhangers moet weet dat ek nie probeer het om ‘n onregverdige voordeel te kry of om my spel te verbeter terwyl ek op die toer is nie.”
- Sapa-AFP