Gesteelde Sampras-trofeë gevind
2011-03-23 12:22
Los Angeles - Die wenner van 14 Grand Slams en die wêreld se voormalige nr. 1-tennisspeler, Pete Sampras, het die meeste van sy trofeë teruggekry nadat dit verlede jaar in November by 'n stoorplek gesteel is, het die Los Angeles Times Woensdag berig.
Die gesteelde items is Saterdagoggend in kartondose by 'n hospitaal in Los Angeles se Marina del Rey-woonbuurt gevind en aan die polisie oorhandig.
Van die items wat Sampras as vermis aangegee het is twee Davisbeker-trofeë, 'n Australiese Ope-beker en 'n Olimpiese ring.
'n Kitaar met die musikant Carlos Santana se handtekening op, is ook onder die gesteelde goedere wat teruggevind is.
Sampras het in 2003 uitgetree nadat hy in sy laaste professionele tenniswedstryd Andre Agassi in die eindstryd van die Amerikaanse Ope geklop het.
Volg Nuus24 op Twitter.
- AFP