George beklink vierde Giro-titel met blitsklim
2010-03-13 13:30
Eunice Visagie
Kaapstad - David George moes Vrydag sy eie rekord in die Giro del Capo-tydtoets oortref om ’n algehele sege in dié vierdaagse padfietstoer te verseker.
George (safindit.co.za) het die 5,5 km-lange heuwelklim van Hoërskool Kampsbaai tot die bopunt van Seinheuwel in 11 minute en 47 sekondes afgeblits. Dit is die eerste keer dat ’n jaer dié klim in minder as 12 minute voltooi het.
Vrydag was dit George én Kevin Evans (11:57) wat deur die 12 minute-kerf gebreek het. Met dié vertoning het Evans (MTN-Energade) algeheel tweede geëindig.
Burry Stander (Specialized) het die dag as algehele voorloper begin. Hy het sy als gegee in die tydtoets, maar George en Evans het ander planne gehad. Stander het derde in die skof én algeheel geëindig. Hy was net ’n enkele sekonde agter Evans algeheel.
George, wat alombekend staan as die koning van Seinheuwel, het Evans met 11 sekondes geklop. Sy tyd oor die 425 km was 10 uur, 32 minute en 26 sekondes.
“Vandag was spesiaal vir my. Elkeen van my Giro-seges is besonders, maar dié een staan vir my uit omdat ek solank moes wag om weer te wen,” het George gesê.
Sy ander seges het in 2002, 2003 en 2004 gekom.
Die teleurstelling was groot vir Stander, maar hy bly positief met die oog op die Cape Epic, ’n uitmergelende agtdaagse bergfietstoer wat aanstaande Sondag begin.
Evans was self teleurgesteld, maar het die positiewe kant van sy vertoning gesien.
“ ’n Tweede plek is natuurlik nie die mees bevredigende uitslag nie, maar ek het nog nooit voorheen eers in die top-10 van die Giro geëindig nie, so om tweede te eindig is heel goed.
“Ek is daarmee saam ook die bobaas van die berge én net die tweede jaer ooit om onder 12 minute hierdie klim te doen, so ek het eintlik genoeg rede om fees te vier,” het Evans gesê.
Malcolm Lange (Medscheme) het die puntekompetisie gewen en Medscheme het ook in die Giro se spankompetisie geseëvier.
- Sport24