Geldtwis kan atlete laat struikel
2011-06-28 09:00
Pretoria – So min as ses Suid-Afrikaanse atlete kan in Augustus aan die Wêreld-atletiekbyeenkoms in Daegu, Suid-Korea, deelneem.
Toe Sport24 Maandag navraag doen oor hoekom so min atlete straks gaan deelneem, het dit geblyk dat die Suid-Afrikaanse Sportkonfederasie en Olimpiese Komitee (Saskok) en Atletiek Suid-Afrika (ASA) in ’n geldtwis gewikkel is.
James Evans, waarnemende voorsitter van ASA, draai geen doekies om nie oor die verknorsing waarin ASA hom bevind.
“Daar is nie geld om ’n span na die Wêreld-atletiekbyeenkoms te stuur nie en Saskok weier om ons te help om geld van die Nasionale Lotery te bekom. Die kans is baie skraal dat enige atleet in Korea in aksie sal wees.”
Evans het gesê die Nasionale Lotery wil niks van hulle af weet nie. “En dit is Saskok se skuld. Terwyl Saskok se Ray Mali as ASA se voorsitter waargeneem en Richard Stander die kantoorhoof was, is amper R2 miljoen aan ASA uitbetaal.
“Daar is geen bewyse van hoe die geld aangewend is nie. Die Nasionale Lotery dring met reg daarop aan om te weet hoe die geld gebruik is en ons het nie antwoorde nie. Daarom is daar geen kans dat ons weer geld van hulle sal kry nie.”
Volgens Evans het Mali en Stander nog minder dokumente agtergelaat as wat Leonard Chuene en Malehopo Molatelo, die geskorste voorsitter en die geskorste uitvoerende hoof, gedoen het.
Toe Tubby Reddy, uitvoerende hoof van Saskok, gevra is wat die probleem is, het hy gesê Evans en sy raad moet ’n slag ophou kla en nie verwag dat Saskok hul werk vir hulle moet doen nie.
Volgens Reddy is dit nie Saskok se plig om ’n atletiekspan na die Wêreldbyeenkoms te stuur nie. “Saskok stuur net spanne na Speles.”
Reddy het wel gesê dat Saskok seker sal maak dat die atlete wat deel uitmaak van sy projek vir uitnemendheid en wat die kwalifiserende A-vereiste oortref het, op die Wêreldbyeenkoms in aksie sal wees.
Dit beteken dat net LJ van Zyl en Cornel Fredericks (albei 400-hekkies), Caster Semenya (800 m) en Sunette Viljoen (spiesgooi) seker is van hul deelname.
Mbulaeni Mulaudzi het as wêreldkampioen in die 800 m outomaties gekwalifiseer.
Robert Oosthuizen (spiesgooi) het die A-vereiste oortref, maar is nie deel van die projek vir uitnemendheid nie.
Khotso Mokoena (verspring) is nog deur Saskok “geswartlys” omdat hy nie aan verlede jaar se Statebondspele deelgeneem het nie en kry daarom nie ’n sent van hulle nie.
Mokoena het Maandag gesê hy en Saskok vergader Dinsdag weer.
Vir die jongste sportnuus volg Nuus24Sport op Twitter.
– Sport24