Geldskok vir sporthengelaars
2010-02-06 07:34
Marelize Barnard
Kaapstad - Sporthengelaars is woedend oor die regering se aankondiging in die Staatskoerant van ’n ongekende verhoging van tot meer as 500% wat hengel- en kreefpermitte onbekostigbaar maak.
Nou dreig hengelaars om net eenvoudig nie meer permitte te gaan uitneem nie wanneer die nuwe tariewe op 1 Mei in werking tree.
Die departement van mariene en kusbestuur het gister bevestig hy het dié verhogings in permitfooie in die Staatskoerant van 29 Januarie aangekondig sodat hy meer geld kan kry uit die honderdduisende hengelaars wat hengel as stokperdjie beoefen. Die geld is nodig juis om die kusgebied te patrolleer en bewaring toe te pas, het Zolile Nqayi, woordvoerder van mariene en kusbestuur, gesê.
Ontstoke hengelaars het intussen begin met petisies teen die verhoogde tariewe en dit gons op hengelklubs se webwerwe oor die “gekheid”.
Dave Goldberg, voorsitter van die Suid-Afrikaanse See-hengelvereniging, het gesê dit is ’n baie sensitiewe kwessie. Daar gaan met regeringsamptenare hieroor vergader word.
Op sy beurt het Nqayi gesê daar word jaarliks sowat 300?000 sporthengelpermitte uitgeneem. Daar kan nie gewaarborg word dat dié syfer dieselfde sal bly nie, so Nqayi wou nie sê hoeveel meer geld daar uit die verhoogde permitte verkry sal word nie. Teen ’n minimum van R500 (wat ’n aansoek en permitte vir die uithaal van aas en ’n hengelpermit insluit) is dit ’n inkomste van R150?miljoen.
“Sporthengelaars het tot nou nie hul deel bygedra nie, daarom word dié sektor se permitfooie só verhoog. Die verhogings geld nie vir bestaansvissers nie,” het Nqayi gesê.
“Dis absoluut belaglik. Ons moet ons permitte jaarliks hernu?.?.?.?hoe verwag hulle moet die gemiddelde hengelaar dit bekostig?” het mev. Sarie Van der Mescht, ‘n lid van die Rod Club in Swartkops buite Port Elizabeth, aan Richard Roberts gesê. Sy het gesê hengelklubs sal bymekaar moet kom en petisies opstel teen die voorgestelde verhoging.
Behalwe die permit, moet hengelaars ook nog bykomstighede koop wat met die sport gepaard gaan, wat ook die sport geldelik kan belemmer.
“En dan is daar ook nog boot-eienaars wat hul lisensies moet betaal en nog hulle bote in stand ook hou?.?.?.?hoeveel geld sal hulle nie jaarliks moet betaal nie?”
Mnr. Allan van Vuuren, voorsitter van die OP-hengelklub, het gesê daar “sal definitief beswaar wees van ons kant af”.
Hy het gesê hy is verstom dat die departement so iets op die tafel sal lê aangesien dit sal beteken dat baie mense nie vir die permitte aansoek sal doen nie.
“Dan moet daar ook nog in ag geneem word dat ons vir ons lisensies vir ons bote sal moet betaal en geld vir brandstof moet hê, buiten die permit se geld.
“Waarom word ons so gemelk? Daar is baie mense (in die klub) wat onlangs hulle werk verloor het...daardie mense sal definitief nie so baie geld kan opdok nie,” het Van Vuuren bygevoeg.
’n Geregistreerde sporthengelaar van die Wes-Kaapse Kushengelvereniging voer aan daar word al die afgelope ses jaar aan mariene en kusbestuur gevra om ’n verteenwoordiger van sy tesourie te stuur om rekenskap te gee van permitgelde wat ingevorder is.
Sporthengelaars het tot nou geen antwoord gekry op dié versoek nie.“Dit word beslis nie gebruik om hengelgeriewe aan die kus te verbeter nie,” het hy gesê.
Lede van die Overberg-hengelklub kla op hul webblad dat wetsgehoorsame hengelaars gestraf word met duurder permitte. Hengelaars beoog nou om sonder permitte “maar die kans te vat”.
– Die Burger