Gedenkdiens vir Carla Swart
2011-01-25 15:12
Port Elizabeth - 'n Gedenkdiens gaan vir die Suid-Afrikaanse fietsryer Carla Swart op 3 Februarie in Port Elizabeth gehou word.
Mede-fietsryers sal om 16:30 by die Vodacom-amfiteater van die Boardwalk-casino bymekaarkom.
Swart (23) is op 19 Januarie dood toe sy omgedraai het in aankomende verkeer tydens 'n oefenrit in die Vrystaat en deur 'n vragmotor getref is.
"Dit was Carla se droom om Suid-Afrika by die wêreldkampioenskappe te verteenwoordig. Ons was so verskriklik trots op haar," het die hoof van padfietsry van Fietsry Suid-Afrika (FSA), Hendrik Lemmer, gesê.
Verlede jaar het Swart agste by die Statebondspele geëindig. Sy het vanjaar by HTC-Highroad se vroue beroepspan aangesluit. En was beskou as een van Suid-Afrika se beste kanse om 'n Olimpiese medalje in 2012 te wen.
Haar gedenkdiens sal saamval met die Suid-Afrikaanse padfietskampioenskappe wat vanaf 2 tot 5 Februarie in Port Elizabeth plaasvind.
Volg Nuus24 op Twitter.