Gebrselassie onttrek aan Tokio-marathon
2011-02-24 13:16
Tokio - Die wêreldrekordhouer in die marathon, Haile Gebrselassie van Ethiopië, het aan Sondag se Tokio-marathon onttrek nadat hy tydens 'n drafsessie geval en sy knie gekneus het, berig Die Burger.
Dit sou die 37-jarige Ethiopiër se eerste deelname gewees het sedert hy verlede jaar sy uittrede afgekondig het.
Gebrselassie het in November verlede jaar weens 'n kniebesering aan die New York-marathon onttrek en onmiddellik daarna gesê hy wil uittree. Die langasem het egter agt dae later sy besluit teruggetrek.
Hy het later gesê hy beplan om in 2012 aan die Olimpiese Spele in Londen deel te neem.
Gebrselassie word wyd gereken as een van die voorste langafstand-atlete van alle tye.
Hy het reeds twee goue medaljes by die Spele verower en het ook vier wêreldtitels in 10 000 m wedlope op sy kerfstok.
Hy het twee jaar gelede in Berlyn, Duitsland die wêreld-marathonrekord van 2 uur 3 minute en 59 sekondes opgestel.
Bly op hoogte van al die jongste sportnuus deur Nuus24Sport op Twitter te volg.
- Sport24