Fransman kap gelyke prysgeld vir tennis
2012-06-28 11:00
Londen – Die Fransman Gilles Simon, wat op die ATP-spelersraad dien, het die bitter debat oor gelyke prysgeld vir tennisspelers heropen deur te sê die mans se spel is meer opwindend.
Simon, wat 13de gekeur is, kritiseer die skuif na gelyke prysgeld waar al die Grand Slams hul kampioene dieselfde bedrag betaal ten spyte dat die man die beste van vyf stelle speel teenoor die vroue se beste van drie.
"Ons praat baie van gelyke prysgeld, maar ek dink dit is iets wat nie in sport werk nie," het Simon gesê.
"Tennis is vandag die enigste sport waar ons ooreenstemmigheid het, selfs al bly manstennis meer opwindend."
Simon het ook die skuif na meer gemengde toernooie buite die vier Grand Slams gekritiseer.
"Ek is nie teen gemengde toernooie gekant nie, dit is net dat ek dink vandag se manstennis is ver voor as dit met die vroue se spel vergelyk word."
"Toe Rome 'n gemengde toernooi geword het was dit om die vroue te red, want ek onthou 'n eindstryd waar daar slegs 20 mense was," het Gilles aan Franse joernaliste gesê.
Simon se landgenoot Marion Bartoli, Frankryk se top-vrouespeler en 'n finalis in die 2007 Wimbledon-eindstryd, het hom egter tereggewys.
"Gedurende die jaar kan ons hoegenaamd nie soveel toernooie as die mans wen nie. Vir ons is daar net soveel toernooie en die Grand Slams om in te speel," het Bartoli gesê.
"Ons is sit net so baie in soos hulle. Die fisieke en persoonlike vereistes sowel as die oefening is dieselfde," het sy gesê.
"Die vroeë mansrondes lok elke geval ook nie so baie mense nie. Daar is seker net vyf of ses mansspelers wat regtig toeskouers na wedstryde lok."
Stem jy saam met Simon dat manstennis meer opwindend is? Deel jou mening hier.
Vir die jongste sportnuus volg Nuus24Sport op Twitter.
- Sapa - AFP
