Franse speler verjaag ouers by Wimbledon
2011-06-27 14:42
Londen – Die negende gekeurde Marion Bartoli van Frankryk het deurgedring na Wimbledon se laaste 16, maar nie voor sy haar pa gevra het om baan 12 te verlaat nie.
Bartoli, die naaswenner in 2007, het Saterdag aangedring dat haar pa en afrigter, Walter, asook haar ma die baan verlaat nadat sy die eerste stel van haar wedstryd in die derde ronde teen Italië se Flavi Pennetta verloor het.
Dié vreemde besluit het die nodige uitwerking gehad want die 26-jarige Bartoli het voortgegaan om 5-7, 6-4, 9-7 te wen.
"Ek was so moeg en uitgeput dat ek my emosies op een of ander manier moes uitdruk," het Bartoli haar optrede verduidelik.
"Ek het my ouers na die wedstryd gesien en hulle verstaan heeltemal. Ek moes eenvoudig van my frustrasies ontslae raak."
Bartoli het gesê haar pa, wat haar sedert haar kinderjare afrig, het die wedstryd verder op televisie gevolg en gesê dit was die beste wedstryd wat sy dogter nog gespeel het.
Lees hier oor die vreemde en skrikwekkende optrede van sommige tennis-ouers.
Vir die jongste sportnuus volg Nuus24Sport op Twitter.
– Sport24