Franse span terug vir Aus-fietstoer
2012-12-06 13:23
Sydney – Die Franse fietsryspan Ag2r La Mondiale sal in Januarie na Australië terugkeer om aan die 15de Tour Down Under-fietstoer deel te neem, het organiseerders Donderdag bevestig.
Ag2r La Mondiale is die enigste span wat elke jaar, sedert die eerste byeenkoms in 1999, in die sesdaagse fietstoer jaag, het die direkteur van die Tour Down Under, Mike Turtur, gesê.
Die Franse span het ook die mees suksesvolle rekord in die fietstoer met voormalige wenners wat Martin Elmiger (2007), Simon Gerrans (2006), Mikel Astarloza (2003) en Gilles Maignan (2000) insluit.
"Die Ag2r-span sal baie kompeterend wees. Hulle bring 'n groep ervare jaers na Australië wat Yauheni Hutarovich, Belarus se 2012-padfietskampioen insluit," het Turtur bygevoeg.
Die Tour Down Under vind vanaf 20 tot 27 Januarie in Adelaide plaas.
Vir die jongste sportnuus volg Nuus24Sport op Twitter.
- Sapa - AFP
