Fourie bespreek Istanboel-plek
2012-01-16 09:19
Pretoria – Lehann Fourie het vir die Binnenshuise Wêreld-atletiekbyeenkoms gekwalifiseer toe hy die 60-hekkies die naweek in Alabama in 7.72 s gewen het.
Dit is sover die naasvinnigste tyd. Net Dexter Faulk (VSA) 7.64 s het al vinniger genael.
Fourie het sy uitdun in 7.82 s gewen.
Dié naweek gaan hy in Virginia deelneem. Daarna sal hy op 4 Februarie in Boston en 11 Februarie in New York in aksie wees.
Fourie het twee jaar gelede sy beste tyd, van 7.67 s, in die kort hekkies gehardloop.
“Ek het verlede jaar glad nie binnenshuis deelgeneem nie omdat ek in Suid-Afrika was.
“Eintlik was dit glad nie ’n goeie jaar vir my nie. Ek het in elkeen van my wedlope gesukkel.
“Ek het besluit om weer binnenshuis deel te neem omdat dit my help om my wegspring en tegniek oor die eerste paar hekkies onder die knie te kry.”
Fourie word vanjaar deur Sylvanues Hepburn in Columbia, Suid-Carolina, afgerig.
“Hy fokus baie op my tegniek en spoed. Ek oefen ook baie harder in die gimnasium as voorheen.”
Sy groot doelwit is om Suid-Afrika op die Olimpiese Spele in Londen te verteenwoordig.
Dit is ’n haalbare doelwit. Twee jaar gelede het hy die 110-hekkies in 13.44 s afgenael.
Dit is 0.08 sekondes vinniger as die kwalifiserende A-vereiste, 13.52 s.
Fourie is nog nie seker of hy in Maart aan een of twee van die Geelbladsye-byeenkomste gaan deelneem nie.
“In ’n Olimpiese jaar doen ’n mens maar alles in jou vermoë om die span te haal.
“Ek het nog geen finale besluit geneem nie. Ek is nie seker hoe die byeenkomste by my oefenprogram gaan inpas nie.
“Ek is net bang as ek glad nie in Suid-Afrika deelneem nie dat ek die gevaar kan loop om nie gekies te word nie.”
Volgens Fourie is die liesbesering wat hom verlede jaar gekelder het iets van die verlede.
“My grootste uitdaging is om my tegniek so vloeiend moontlik te kry want dan sal ek beseringvry bly.”
Die Binnenshuise Wêreldbyeenkoms is van 9 tot 11 Maart in Istanboel, Turkye.
– Vir die jongste sportnuus volg Nuus24Sport op Twitter.
– Sport24