Formule Een dalk gou in Suid-Afrika
2010-07-11 13:42
Silverstone - Die Formule Een-baas Bernie Ecclestone glo 'n Grand Prix-wedren kan weer in Suid-Afrika aangebied word binne drie jaar ná die suksesvolle aanbieding van die Wêreldbeker-sokkertoernooi.
Die laaste wedren in Suid-Afrika was in 1993, en Formule Een-wedrenne vind sedert 1985 nie meer op 'n gereelde basis in Suid-Afrika plaas nie.
"Ons praat al 'n hele ruk lank met mense daar," het Ecclestone Sondag aan die BBC gesê, enkele ure voor die Britse Grand Prix en die Wêreldbekereindstryd. "Dis 'n ander kontinent waar ons behoort te wees. Hopelik sal mense nou dink wat die Wêreldbekertoernooi vir Afrika gedoen het kan Formule Een ook doen. Dis lekker om te dink ons sal dan eintlik die hele wêreld dek."
Hoewel Formule Een-wedrenne voorheen by die Kyalami-renbaan naby Pretoria aangebied is, het Ecclestone 'n voorkeur vir Kaapstad.
"Ons het gepraat met die mense in Kaapstad; daar is een of twee plekke daar wat goed lyk en wat definitief 'n moontlikheid is," het Ecclestone gesê. "Ons praat daaroor om 'n baan te bou. Dis sal waarskynlik so drie jaar neem."
- Volg Nuus24 op Twitter
- SAPA