Fietsryers trotseer hitte, berge
2011-12-05 09:01
Stellenbosch. – Speke het gesing en kettings het gekraak toe duisende fietsryers Sondagoggend die hitte trotseer en teen die heuwels en dale van die Boland uit getrap het.
Die Burger-fietstoer het vroegoggend by die Hoërskool Stellenbosch begin en altesame 6 600 fietsryers het van heinde en verre gekom om aan die uitdagende 92km-roete of die korter 44km-roete deel te neem.
Die kwik het volgens die Suid-Afrikaanse Weerdiens Sondag tot 39°C in die gebied gestyg.
Fietse het ná die wedren op die Hoërskool Stellenbosch se sportveld gesaai gelê soos fietsryers inderhaas na skadukolle verkas het.
Dáár, uit die pad van die skroeiende son, het hulle gerus en oor die wedren gesels onderwyl hulle iets koel gedrink het.
Deelnemers van albei roetes het teen die Ou Helshoogtepas uitgery, waarna die roetes geskei het.
Die langer roete het tot digby Wellington gestrek en die korter roete verby Simondium.
Stewart Banner, Robert Fish en Gordon Bothma – almal 78 – was die oudste deelnemers, terwyl Jamie Penfold (10) die jongste deelnemer was.
Die voormalige Cope-leier, Mosiuoa Lekota, het ook in die 92km-wedren getrap.
Herman Fouche van die Cape Market-span het eerste geëindig, met Jaco Venter en Charles Solomon tweede en derde.
Die Sweed Jennie Stenerhag was die eerste vrou oor die wenstreep. Dit is die vyfde agtereenvolgende jaar dat sy die kompetisie wen sedert dit in 2007 begin het.
Mes. Maroesjka Matthee was tweede en Marina Wege derde.
Dr. Basil Bonner, mediese beampte vir die wedren, het gesê die dag het oor die algemeen goed verloop.
Mediclinic SA se mobiele eenheid het altesame 47 fietsryers behandel.
“Drie fietsryers is hospitaal toe – twee vir geringe kopbeserings en ’n ander een omdat hy ’n epileptiese aanval op sy fiets gekry het,” het Bonner gesê.
“Die ander fietsryers het meestal skrape en snye opgedoen en ’n paar was ontwater.”
William Petersen van die Kinetic-span was in die middel van ’n bondel fietsryers wat op ’n treinspoor neergeslaan het.
“’n Stuk of sewe van ons het geval toe die mat wat oor die spoorlyn gegooi was, opgewaai het. Ek het net skrape opgedoen, maar dit is baie teleurstellend.”
Dié deelnemers kon ongelukkig nie die wedren voltooi nie.