Fietsryer in hospitaal na bloedoortapping
2011-02-09 13:06
Rome - Italië se Olimpiese komitee (Coni) het Dinsdag 'n ondersoek na die fietsryer Riccardo Ricco geloods midde berigte dat hy 'ou' bloed vir 'n bloedoortapping gebruik het wat tot sy hospitalisasie gelei het, het regsbeamptes bekendgemaak.
Ricco se pa, Rubinho Ricco, het Maandag aangedui dat sy seun se "niere dalk ingegee" het.
Maar 'n berig in die Gazzeta dello sport beweer 'n dokter (sy naam is nie bekendgemaak nie) het gesê Ricco het met sy aankoms by die Pavullo-hospitaal aangedui dat hy drie weke oue bloed gebruik het om 'n bloedoortapping op homself te doen. En dat hy (Ricco) dink die 'ou' bloed kon hom dalk siek gemaak het.
Die Italiaanse aanklaer in Modena het met 'n ondersoek begin en wag tans op toetse van die hospitaal.
"Slegs nadat ons die uitslae van die toetse ontvang het kan ons tot 'n gevolgtrekking kom of enige wette oor opkikkers oortree is," het aanklaer Vito Zincani, wat die Gazetta se berig bevestig het, gesê.
Ricco (27) het in Maart vanjaar tot fietsry teruggekeer nadat hy deur Italië se Olimpiese komitee vir twee jaar geskors is toe hy in die 2008 Tour de France positief getoets het vir opkikkers.
Bly op hoogte van al die jongste sportnuus deur Nuus24Sport op Twitter te volg.
- Sport24