Fietsry-chaos in Baai ‘verkeersowerhede se skuld’
2011-02-05 09:27
Pretoria - Die derde dag van die Suid-Afrikaanse padfietsbyeenkoms in Port Elizabeth het Vrydag chaoties begin toe Fietsry Suid-Afrika (FSA) besluit het dat ryers nie mag wegspring voordat hul veiligheid gewaarborg kan word nie.
Dit het daartoe gelei dat die wedrenne eers twee uur later begin het.
Van die fietsryers was woedend daaroor en het dadelik die bestuur van FSA van onbevoegdheid beskuldig.
Een van die redes vir die jaers se woede was omdat sommiges enkele ure ná hul deelname terug huis toe wou vlieg. Die laat wegspring het beteken dat hulle inderhaas ander reisreëlings moes tref.
Hendrik Lemmer, FSA se direkteur van padfietsry, sê hy het begrip vir die fietsryers se woede. “Maar ek wil dit duidelik maak dat die veiligheid van fietsryers nie onderhandelbaar is nie. Daar is geen wyse waarop ons ryers aan renne sal laat deelneem as ons weet daar is ’n goeie kans dat een van hulle doodgery kan word nie.”
Lemmer verkwalik Port Elizabeth se verkeersowerhede vir die chaos.
“Ons het voor die padbyeenkoms talle vergaderings met die verkeersowerhede gehad waar ons presies vir hulle verduidelik het wat ons van hulle verwag.
“Hulle het daartoe ingestem, maar Donderdag in die junior meisies se padren het ons besef dit waarop ons ooreengekom het, gaan nie gebeur nie.
“Daar was motors op die paaie waar daar ’n verbod op voertuie sou geld.
“Van die motoriste was ook erg moedswillig en het versperrings verwyder.
“Ander het weer die verkeersbeamptes se opdragte verontagsaam.
“Dit is lewensgevaarlik as fietsryers teen 40 km/h per uur op ’n pad jaag waar daar vir hulle gesê is daar sal geen verkeer wees nie.
“Ons het vanoggend vroeg op dié roete gery en besef dit is steeds te gevaarlik.
“Ons moes toe die roete verkort sodat die jaers net op paaie sou ry waar ons hul veiligheid kon waarborg,” het Lemmer gesê.