Ferrari-baas kap terug
2010-07-27 14:24
Hockenheim - Ferrari se president Luca di Montezemolo het Fernando Alonso se omstrede oorwinning Sondag by die Duitse Grand Prix in Hockenheim verdedig.
Alonso het eerste oor die wenstreep gejaag met sy spanmaat Felipe Massa wat in die tweede plek geëindig het.
Ferrari het ‘n boete van $100 000 (sowat R750 000) ontvang nadat motorsport se internasionale beheerliggaam (FIA) bevind het dat Massa opsetlik stadiger gery het sodat Alonso hom kan verbysteek.
Behalwe vir die boete, staar Ferrari moontlik 'n groter straf in die gesig nadat die FIA besluit het om die voorval verder te ondersoek.
Di Montezemolo het hom vererg vir die hewige kritiek wat dié voorval ontlok het en die span se opponente van skynheiligheid beskuldig.
Hy het gesê spanbevele was nog altyd deel van Formule Een.
“Sulke goed gebeur al sedert Nuvolari (Ferrari-renjaer in die 1930’s) se jare. Ek het dit self ervaar in die dae van Niki Lauda," het die Ferrari-baas gesê.
“Hou asseblief op om skynheilig te wees, selfs al kan ek glo dat sommige mense sou wou sien hoe Ferrari se twee renjaers mekaar met ‘n ongeluk uithaal,” het Montezemolo gesê.
“By Ferrari is dit die span wat eerste kom, nie die renjaer nie,” het hy bygevoeg.
Daar was gemengde reaksie oor dié voorval met die huidige wêreldkampioen Jenson Button (McLaren) wat gesê het spanbevele is “verkeerd al is dit soms onvoorkombaar.”
Die sewemalige Formule Een-kampioen, Michael Schumacher, het sy gewese spanmaat (Massa) verdedig. “Dit gaan nie oor ‘n Sondagmiddag-rit nie, maar oor punte vir die titel,” het Schumacher gesê.
Die Red Bull-renjaer, Sebastian Vettel, wat die Duitse Grand Prix in die derde plek klaargemaak het, het die voorval as teleurstellend vir toeskouers beskryf.
Bly op hoogte van al die jongste sportnuus deur Nuus24Sport op Twitter te volg.
- Sapa-DPA