Federer tuimel voor Sweed
2010-06-02 09:01
Parys. – Robin Soderling van Swede het Dinsdag hier een van die grootse skokke in vanjaar se Franse Ope-tennistoernooi gelewer toe hy Roger Federer, eerste gekeur, met 3-6, 6-3, 7-5, 6-4 in die kwarteindronde van die mans-enkelspel uitgeskakel het.
Soderling, vyfde gekeur, het die Spanjaard Rafel Nadal in verlede jaar se toernooi uitgeskakel.
Hy kom nou teen Tomas Berdych van die Tsjeggiese Republiek te staan wat die Rus Mikhail Youzhny met 6-3, 6-1, 6-2 uitgeskakel het.
Dit was Soderling se eerste oorwinning in 12 probeerslae oor Federer en ook die eerste keer in ses jaar dat Federer nie die halfeindronde kon haal nie.
Hy het in 2004 in die derde ronde teen Gustavo Kuerten verloor.
“Ek het vandag baie goed gespeel en ek glo nie dit kan beter as dit nie,” het Soderling gesê.
Die wedstryd is weens reën onderbreek, maar dit het geen invloed op die 25-jarige Sweed se puik vertoning gehad nie.
Hy het drie meer wenners as die kampioen geslaan en sy algemene spel en afslane was in die kol.
In die vroue-afdeling het die onbesonge 29-jarige Francesca Schiavone ook verras toe sy die eerste Italiaanse vrou in die moderne era geword het wat die halfeindronde van ’n Grand Slam-tennistoernooi kon haal.
Die 17de gekeurde Schiavone het die 19-jarige Caroline Wozniacki van Denemarke, derde gekeur, met 6-2, 6-3 in die kwarteindronde geklop.
Sy kom nou teen die vyfde gekeurde Rus, Elena Dementieva, te staan wat haar landgenoot Nadia Petrova met 2-6, 6-2, 6-0 uitgeskakel het.
Die stryd tussen die twee Russe was deurspek met foute. Albei spelers het gesukkel met beenbeserings en dit was nie ’n kragmeting wat lank onthou sal word nie. “Ek kon nie behoorlik beweeg nie en was nie in staat om agter balle aan te hardloop nie,” het Petrova gesê.
“Ek wou die handdoek ingooi nadat ek my afslaan vroeg in die derde stel verloor het, maar dit is moeilik om sommer net so op te gee. Ek hou daarvan om enduit te speel, al is ek nie ’n honderd persent (reg) nie,” het Petrova gesê.
Schiavone sê haar taktiek om aggressief te speel en die Deen onder druk te plaas, het goed gewerk.
“Ek doen hierdie werk al my lewe lank. Dit is ’n baie spesiale emosie om die halfeindronde te haal as jy elke oggend en elke middag hard werk,” sê die Italianer.
“Sy (Schiavone) sit baie tol op die bal en speel nie tipiese vroue-tennis nie,” het Wozniacki erken.
Bly op hoogte van al die jongste sportnuus deur Nuus24Sport op Twitter te volg.
- Sport24