Federer te sterk vir Murray
2012-07-08 19:14
Kaapstad – Andy Murray en sy aanhangers se Wimbledon-droom lê aan skerwe ná Switserland se Roger Federer hom in vier stelle geklop het in dié wêreldbekende toernooi se enkelspel-eindstryd.
Federer het met 4-6, 7-5, 6-3, 6-4 geseëvier in 'n meesleurende tweestryd wat vir heelwat opwinding gesorg het.
Die intensiteit van spel was reeds in die eerste stel indrukwekkend, met albei spelers wat vinnig was om uit mekaar se foute munt te slaan. Veral Federer het vroeg in die wedstryd onnodige foute begaan.
Murray het die eerste stel uiteindelik met 6-4 gewen.
Die tweede stel het vir niks minder opwinding gesorg nie, met beide Murray en Federer wat hard gewerk het om 'n deurbraak te maak. Federer het laat in die tweede stel die oorhand gekry, en dit uiteindelik met 7-5 beklink.
Beide spelers het in dié stadium met drie kishoue elk gespog.
Reën het spel vroeg in die derde stel onderbreek, maar dit het ná 40 minute voortgegaan ná die baan se dak toegemaak is.
(Leon Neal, AFP)
Federer het met sy terugkeer tot die baan heelwat sterker gelyk, en het die derde stel op oortuigende wyse met 6-3 gewen, hoewel die spel niks minder aanskoulik was nie. Tog moes Murray van dié punt af heelwat harder werk vir sy punte.
Murray het verbete teruggeveg, maar Federer het die vierde stel met 6-4 gewen.
Dit is die sewende keer wat Federer die Wimbledon-trofee omhoog hou. Federer is die enigste manlike speler in die geskiedenis om die eindstryd van elk van die Grand Slam-toernooie minstens vyf keer te bereik.
(Leon Neal, AFP)
– Vir die jongste sportnuus volg Nuus24Sport op Twitter.
- Nuus24
