Federer blameer beserings
2010-06-30 21:42
Londen – Roger Federer het gesê ‘n besering aan sy rug en regterbeen het ‘n sleutelrol gespeel in die feit dat hy in die Wimbledon-kwarteindronde uitgeval het.
Dít kom nadat die Tsjeggiese tennisster, Tomas Berdych, hom Woensdag 6-4, 3-6, 6-1, 6-4 geklop het.
Federer sal nou vir die eerste keer sedert 2002 nie te siene wees in Wimbledon se eindstryd nie.
Volgens Federer is hierdie nederlaag te danke aan die feit dat hy sukkel met twee beserings wat net nie wil beter word nie.
“Ek sukkel bietjie met my rug en my been,” het hy gesê.
“Hierdie beserings laat my nie toe om te speel soos ek wil speel nie. Dit is baie frustrerend om die minste te sê.
“Die beenbesering kom sedert die eindronde van Halle en die rugpyn het sowat vyf of ses dae gelede begin. As jy in pyn is voel jy net nie gemaklik nie. Mens kan nie konsentreer op die spel nie,” het hy bygevoeg.
“Onder die omstandighede voel ek tog dat ek ‘n ordentlike ronde gehad het. Maar dit is net eenvoudig nie goed vir mens om te speel as jy so sleg voel nie. Nou gaan ek darem kans kry om bietjie te rus.”
Federer het agt uit die vorige 10 kragmetings teen Berdych gewen maar kon Woensdag net nie daarin slaag om sy opponent te klop nie.
Volgens Berdych moet Federer egter nie sy beserings blameer vir die feit dat hy verloor het nie.
“Ek weet nie of hy net vir ‘n verskoning gesoek het nie. Dit gebeur met almal van ons. Ek dink hy was nog elke slag 100% gereed om te speel. Dit is sy eie opinie. Hy het duidelik ‘n rede nodig en dit is wat hy gesê het,” het Berdych gesê.
Bly op hoogte van al die jongste sportnuus deur Nuus24Sport op Twitter te volg.
- SAPA