Federer beboet ná vloekery
2009-09-18 04:17
New York - Roger Federer is met sowat $1 500 (R11 000) beboet nadat hy tydens die Amerikaanse Ope met die stoelskeidsregter ‘n woordewisseling gehad het en gevloek het.
Die woordewisseling het tydens die mans-finaal plaasgevind en is deur mikrofone opgeneem.
Chris Widmaier, ‘n woordvoerder vir die toernooi, sê Federer is met dieselfde hoeveelheid as twee ander spelers beboet.
Volgens Widmaier is boetes ter waarde van sowat $31 500 (R233 000) tydens die toernooi opgelê.
Die hoogste is dié van Serena Williams vir swak sportmanskap. Sy is met $10 000 (R74 000) beboet.
Daniel Nestor van Kanada moes ook vir swak sportmanskap $5 000 (sowat R37 000) opdok.
- AP