F1-ster verwelkom terugkeer na Kanada
2010-06-10 09:35
Montreal. – ’n Rapsie meer as twee jaar nadat Roberta Kubica sy deurbraak met ’n oorwinning in die Kanadese Grand Prix gemaak het, is Formule Een terug op die Circuit Gilles Villeneuve.
“Die terugkeer van Formule Een na Noord-Amerika is ’n positiewe stap vir die sport,” het Martin Whitmarsh, spanbaas van McLaren, gesê.
Dié ren was van 1978 tot 2008 op die kalender totdat dit verlede jaar geskrap is nadat Bernie Ecclestone, F1 se president, nie tot ’n vergelyk met die organiseerders kon kom nie.
Laat verlede jaar is dié wedren, danksy ’n geld-inspuiting van meer as $70 miljoen, tot in 2014 gered. Die Kanadese regering en Montreal se toerismeraad gee elk $24 miljoen, Quebec gee $19 miljoen en die munisipale regering byna $5 miljoen.
“Daar is altyd ’n fantastiese atmosfeer in die naweek wanneer dit gejaag word,” het Whitmarsh gesê. “Die baan is vinnig en onverdraagsaam – die regte resep vir ’n opwindende, onvoorspelbare en mededingende wedren.”
Die baan het lang reguit dele, stadige skerp draaie en kronkels en sal die renmotors se remme veral in die eerste deel van die wedren – wanneer die petroltenke nog swaar is – toets.
“Dit is fantasties om ná ’n jaar terug te wees in Montreal,” het die wêreldkampioen, Jenson Button, gesê.
“Dis nie ’n plek waar jy ’n fout moet maak nie, want daar is betonmure naby die baan.”
Bly op hoogte van al die jongste sportnuus deur Nuus24Sport op Twitter te volg.
- Sport24
- Sapa - AP