Ernie benoem vir Laureus-toekenning
2013-01-09 16:26
Fotogalery - Ernie Els wen die Britse Ope
klik op klein foto bo om groter prentjie te sien
Johannesburg – Die gholfspeler Ernie Els is die enigste Suid-Afrikaner wat vanjaar vir ‘n Laureus-sportstoekenning benoem is.
Die Big Easy het in Julie verlede jaar sy eerste Major-toernooi in 10 jaar gewen toe hy by die Britse Ope koning gekraai het.
Sy vertoning in die toernooi het hom ‘n nominasie in die kategorie vir terugkerende sterre besorg.
Intussen is ses mans vir die Laureus Sportsman van die Jaar-toekenning benoem. Die Jamaikaanse atleet Usain Bolt, die Britse langafstandatleet Mo Farah, die Argentynse sokkerster Lionel Messi, die Amerikaanse swemmer Michael Phepls, die Duitse Formule Een-kampioen Sebastian Vettel en die Britse fietsryer Bradley Wiggins kom teen mekaar te staan vir die gesogte titel.
Die Britse atleet Jessica Ennis, die Amerikaanse atleet Allyson Felix, die Amerikaanse swemmer Missy Franklin, die Jamaikaanse atleet Shelly-Ann Fraser-Pryce, die Amerikaanse skiër Lindsey Vonn en die Amerikaanse tennis-ster Serena Williams is in die kategorie vir Sportvrou van die Jaar benoem.
Die Laureus-sporttoekennings, die sogenaamde Oscars van wêreldsport, sal op 11 Maart in Rio de Janeiro gehou word.
– Vir die jongste sportnuus volg Nuus24Sport op Twitter
- SAPA
