Epic sal fietsryers opnuut beproef
2011-10-27 10:04
Pretoria – Om ’n seun te wees van die man wat elke jaar die roete van die Absa Cape Epic beplan, hou beslis geen voordele in nie, al is jy ook die Suid-Afrikaanse marathon-bergfietskampioen.
Daarvan kan Kevin Evans (Nedbank 360Life) beslis getuig, want hy het gisteraand, net soos die meeste van Suid-Afrika se ander bergfietryers, die eerste keer gehoor hoe die roete vir aanstaande jaar se toer (25 Maart tot 1 April) daar gaan uitsien.
Evans se pa, Leon, het die roete, wat as een van die strafstes beskou word, uitgelê. “My pa praat amper nooit met my oor die roetes wat hy beplan nie. Hy sal hoogstens vra hoe ek daaroor sal voel om ’n sekere gedeelte te ry,” sê Kevin.
“Al wat ek weet, is dat die roete elke jaar strawwer gaan wees. Ek bly verstom hoe my pa daarin slaag om nuwe roetes te ontdek. Hy moet ongelooflike kontakte hê tussen die boere op wie se plase die Epic plaasvind.”
Volgens Evans jr. verkies hy eintlik om nie vooraf te veel oor die Epic-roetes te weet nie. “Die paar keer wat ek geweet het wat om te verwag, het dinge nog elke keer verkeerd geloop. Hoe minder ek weet, des te beter.”
Evans sr. staan in internasionale bergfietskringe as “Dr Evil” bekend, maar dit skeel hom min.
“Enigiemand wat dink aanstaande jaar se Epic gaan maklik wees, is ’n dwaas. Dit is my werk om seker te maak die jaers word fisiek tot die uiterste toe beproef. My reputasie ly daaronder as die jaers begin praat van ’n maklike Epic.
“Aanstaande jaar is daar twee dae waarop die jaers dit rustig kan vat. Die eerste is wanneer hulle registreer en die tweede is die Maandag nadat hulle klaargemaak het.”
Kevin Vermaak, die Epic se geesteskind, het sy tevredenheid uitgespreek met die roete. “Ons gaan nie doelbewus uit ons pad om die toer elke jaar strawwer te maak nie. Ons grootste uitdaging is om seker te maak dat die talle internasionale jaers en ook die plaaslike jaers wat deelneem, die kans kry om van die mooiste dele in die Wes-Kaap op hul bergfietse te ervaar.”
– Vir die jongste sportnuus volg Nuus24Sport op Twitter.
- Die Burger