Eindstryd nié tussen Williams-susters
2010-06-30 09:33
Londen – Serena Williams is op soek na ’n vierde Wimbledon-titel en ná Dinsdag se opskuddings hier in die Wimbledon-tennistoernooi is die weg gebaan vir dié Amerikaner om haar titel suksesvol te verdedig.
Die eerste gekeurde en kampioen het haar kwarteindstryd teen Na Li van China met 7-5, 6-4 gewen.
Williams kom nou in môre se halfeindstryd teen Petra Kvitova te staan.
Dié ongekeurde Tsjeg het Estland se Kaia Kanepi, wat moes kwalifiseer vir die toernooi, in ’n taai stryd met 4-6, 7-6, 8-6 geklop.
Die sal die eerste keer wees dat Kvitova, wat in die vorige ronde met die derde beste speler ter wêreld, Caroline Wozniacki, afgereken het, in die halfeindronde van ’n Grand Slam-toernooi speel.
Sy is 62ste op die wêreldranglys en kon voor vanjaar se toernooi nog nooit ’n wedstryd op Wimbledon wen nie.
Williams was die enigste speler wat haar status as gunsteling gestand gedoen het.
Tsvetana Pironkova het die eerste Bulgaarse vrou geword wat die halfeindronde van ’n Grand Slam-toernooi haal toe sy die vyfmalige kampioen en tweede gekeurde, Venus Williams, uitgeskakel het.
“Dit is soos ’n droom. Ek het nie gedink ek sal só goed speel en so ver in die toernooi vorder nie,” het Pironkova, 82ste op die wêreldranglys, gesê.
“Ek dink ek het nogal goed gespeel. Ek is baie tevrede en gelukkig.
“Ek het al voorheen ’n wedstryd teen haar gewen en gedink ek kan dit dalk weer doen, so ek het daarvoor gegaan,” het die 22-jarige speler gesê wat vier jaar gelede met Venus Williams in die Australiese Ope afgereken het.
Vera Zvonareva, wat in 2008 op die Olimpiese Spele die bronsmedalje gewen het, het die agtste gekeurde Kim Cljisters uitgeskakel.
Dié Rus het die Belg met 3-6, 6-4, 6-2 geklop. Dit was die eerste keer in ses probeerslae dat Zvonareva met Clijsters afgereken het. “Ek het al gedroom daarvan om in die halfeindronde van Wimbledon te speel. Ek is baie opgewonde,” het die 21ste gekeurde gesê.
Zvonareva en Pironkova pak mekaar nou in môre se halfeindronde.
Bly op hoogte van al die jongste sportnuus deur Nuus24Sport op Twitter te volg.
- Sport24