Dusi-duo was foutloos
2012-02-19 08:05
Pietermaritzburg – Andrew Birkett en Jason Graham se vreugde het Saterdag geen perke geken nie nadat hulle hul titel in die Unlimited Dusi se K2-wedvaart suksesvol verdedig het.
Die paar, wat ook in 2010 gekombineer het vir ’n sege in dié kompetisie, se veldtog was foutloos en hul algehele tyd van 7 uur, 43 minute en 2 sekondes is op drie na die vinnigste wentyd tot nog toe.
Hank McGregor en Len Jenkins was algeheel tweede in 7:51:58 en Thulane Mbanjwa en Sibonelo Zondi derde in 7:54:24.
Die 21-jarige Birkett is nou ook een van ’n handjievol kanovaarders wat met drie Dusi-seges kan spog. Hy het verlede jaar die K1-wedvaart gewen.
Birkett en Graham het hul algehele voorsprong Saterdag na vyf minute gerek in die laaste skof van 36 km tussen die Inanda-dam en Durban se Blue Lagoon. Die duo het hul sukses met breë glimlagte gevier en hul spane triomfantelik bo hul koppe uitgestoot.
Oomblikke later het hulle met ’n groot gejuig in die water gespring.
Die 33-jarige Graham het dit duidelik gemaak dat daar geen kans is dat hy en die 21-jarige Birkett oor twee jaar sal probeer om die K2-wedvaart ’n derde keer te wen nie.
“Dis dit vir my. Dit was die laaste keer dat ek geroei het om ’n Dusi te wen,” het Graham gesê, “Ek kan nie langer bekostig om my familie so af te skeep nie.
“Ek moet Andrew bedank dat hy kans gesien het om vir die tweede keer saam met die ‘ou ballie’ aan ’n Dusi deel te neem.”
Birkett was ewe vol lof vir Graham.
“Jason is die een wat my geleer het dis die klein dingetjies wat op die ou einde die grootste verskil maak.”
Graham, ’n onderwyser aan die Pietermaritzburg High School, het Birkett as negejarige die fynere kunsies van kanovaart begin leer. Hy het ook al sewe jaar gelede voorspel dat Birkett eendag een van die Dusi-legendes gaan word.
Abbey Ulansky (voorheen Miedema) en Robin Kime het die rekord vir die vinnigste vroue-wedvaart na 8:41:59 verbeter. Dit was die perfekte afsluiting aan Ulansky se Dusi-loopbaan. Sy het gister Marlene Loewenstein se rekord van agt seges in die Dusi-vrouewedvaart geëwenaar.
Vir die jongste sportnuus volg Nuus24Sport op Twitter
– Sport24
