Duitsland verneder SA in Davisbeker-stryd
2010-09-20 08:38
Pieter-Louis Myburgh en Sapa
Johannesburg - Die Davisbeker-tenniskragmeting in Stuttgart het Sondag nog vernedering vir die Suid-Afrikaanse span meegebring toe Rik de Voest én Izak van der Merwe hul enkelspelwedstryde teen Duitsland verloor het.
Vrydag en Saterdag se nederlae in die dubbel- en enkelspelwedstryde teen die gasheer het reeds Suid-Afrika se poging gepootjie om vir die gesogte Wêreldgroep te kwalifiseer.
De Voest en Van der Merwe het die geleentheid gehad om die span se naam in ere te herstel, maar moes nóg enkelspel-loesings, teen Florian Mayer en Andreas Beck, verduur.
De Voest het ’n moedige stryd teen Mayer gevoer en die Duitser vir drie stelle besig gehou om ’n 5-0 oorrompeling te vermy, maar Mayer het deurgedruk en eindelik met 6-3, 6-7 (10/8), 6-2 gewen.
Van der Merwe was minder veglustig en het die knie sonder veel teenstand met 5-7, 2-6 teen Beck gebuig.
Vanjaar se Davisbeker-reeks het vanuit ’n Suid-Afrikaanse oogpunt bitter min gebied om oor opgewonde te word.
Die feit dat De Voest se “sege” in die tweede stel teen Mayer as ’n hoogtepunt beskou word, is ’n aanduiding van die bedenklike stand van sake in Suid-Afrikaanse tennis.
Maar volgens Suid-Afrika se nie-spelende kaptein, John-Laffnie de Jager, gaan sy span aanhou probeer om die boonste vlak van dié internasionale spankompetisie te bereik.
“Ons ding mee teen ouens wat in die top-100 op die wêreldranglys is.
“Ons enigste speler in die top-100 is Wesley Moodie, wat 20ste in die dubbelspel gekeur is, so dit is baie taai.”
Vir De Jager is die wyse waarop De Voest sy Duitse teenstander vir die oorwinning laat sweet het ook ’n rede om optimisties oor die span se toekoms te voel.
“Rik se peil is baie goed.
“Hy het goed gespeel in die aanloop tot hierdie wedstryde en het ook gewys dat hy goed op klei speel en maklik kan aanpas,” het die kaptein De Voest geloof.